ຕາມແຫຼ່ງຂ່າວ ໜັງສືພິມ ເສດຖະກິດ-ການຄ້າ ລາຍງານເມື່ອວັນທີ 3 ເມສາ 2017 ນີ້ວ່າ ໃນໄລຍະຊ່ວງປີໃໝ່ໃນແຕ່ລະປີຜ່ານໆມາ ເຄີຍມີການປັບຂຶ້ນລາຄາສິນຄ້າຂອງຊາວຄ້າຂາຍ ເຊິ່ງໄດ້ກະທົບຕໍ່ພາບພົດໂດຍລວມຂອງສັງຄົມ ແລະເຮັດໃຫ້ເພີ່ມຕົ້ນທຶນການໃຊ້ຈ່າຍຂອງຜູ້ບໍລິໂພກ, ດັ່ງນັ້ນ ກະຊວງ ອຸດສະຫະກຳ ແລະການຄ້າຈຶ່ງໄດ້ຄຸມເຂັ້ມຕໍ່ກໍລະນີດັ່ງກ່າວ ເພື່ອປົກປ້ອງຜູ້ຊົມໃຊ້ ແລະປະຕິບັດຕາມຄຳສັ່ງຂອງລັດຖະມົນຕີ ກະຊວງອຸດສະຫະກຳ ແລະການຄ້າ.
ທ່ານ ສົມປະສົງ ສະຫງວນວົງ ຮອງຫົວໜ້າພະແນກອຸດສະຫະກຳ ແລະການຄ້າ ນະຄອນຫຼວງວຽງຈັນ ໄດ້ກ່າວວ່າ: ເພື່ອເຮັດໃຫ້ການຈຳໜ່າຍແລກປ່ຽນສິນຄ້າ-ຂາຍສິນຄ້າ ພາຍໃນຕະຫຼາດມີຄວາມສະດວກ ເປັນລະບຽບຮຽບຮ້ອຍ ແລະມີຄວາມປອດໄພ ພ້ອມທັງລົງກວດກາ ຕິດຕາມລາຄາສິນຄ້າ ການຈັດຕັ້ງການເຄື່ອນໄຫວຕົວຈິງ ໃນໄລຍະປີໃໝ່ລາວ ແລະລົງຕິດຕາມກວດກາເລີ່ມແຕ່ວັນທີ 6-17 ເມສາ 2017 ພາຍໃນຕະຫຼາດຕ້ອງປະຕິບັດຕາມລະບຽບຢ່າງເຂັ້ມງວດ, ການປະຕິບັດລະບຽບການກຳນົດລາຄາຂາຍຍົກ-ຂາຍຍ່ອຍ ຊີ້ນໝູ ຢູ່ຕາມທ້ອງຕະຫຼາດ ໃຫ້ຂາຍໃນລາຄາທີ່ກຳນົດໄວ້ຄື: ລາຄາໝູໜ້າຟາມ ບໍ່ໃຫ້ເກີນ 19 ພັນກີບ, ລາຄາຂາຍຍົກໝູໝົດຕົວ ທີ່ຂ້າຄົວ ແລະຊຳແຫຼະເປັນຊີ້ນບໍ່ໃຫ້ເກີນ 23 ພັນກີບ ເຊິ່ງລາຄານີ້ແມ່ນລາຄາຊາວຄ້າຄົນກາງສົ່ງໃຫ້ລູກຂຽງຮອດຕະຫຼາດ, ສຳລັບລາຄາຍ່ອຍຂອງລູກຂຽງ ໃຫ້ຜູ້ບໍລິໂພກຢູ່ທ້ອງຕະຫຼາດຊີ້ນໝູປະເພດ 1 (ຊີ້ນກ້ອນ, ດູກຂ້າງ, ຊີ້ນສາມຊັ້ນ) ຕໍ່າສຸດ 33 ພັນກີບ ແລະສູງສຸດບໍ່ໃຫ້ເກີນ 35 ພັນກີບ/ກິໂລກຣາມ, ພ້ອມດຽວກັນນັ້ນ ຍັງໃຫ້ປະຕິບັດມາດຕະການຕໍ່ຜູ້ລະເມີດ ເພື່ອແນໃສ່ເຮັດໃຫ້ທຸກພາກສ່ວນໃນສັງຄົມນຳໄປຈັດຕັ້ງປະຕິບັດ ໃຫ້ມີປະສິດທິຜົນ
ທ່ານ ບຸນທຽນ ແກ້ວສີພາ ຫົວໜ້າກົມການຄ້າພາຍໃນ ກໍໄດ້ກ່າວຢໍ້າຕໍ່ວ່າ: ການຄຸ້ມຄອງສິນຄ້າ ໃນໄລຍະຜ່ານມາເຈົ້າໜ້າທີ່ການຄ້າ ໄດ້ລົງເກັບກຳຂໍ້ມູນ ແລະລາຄາສິນຄ້າ ພ້ອມທັງເປີດເຜີຍລະບຽບການຄ້າ, ການແຈ້ງການຂອງພະແນກອຸດສະຫະກຳ ແລະການຄ້າ ຕິດຕາມຄຸ້ມຄອງລາຄາສິນຄ້າ ໃຫ້ເປັນໄປຕາມກົນໄກຕະຫຼາດ ບົນພື້ນຖານຄວາມເປັນທຳລະຫວ່າງຜູ້ຊື້ ແລະຜູ້ຂາຍ ກໍໄດ້ປະຕິບັດໜ້າທີ່ຂອງຕົນຢູ່ສະເໝີ, ກົມການຄ້າພາຍໃນ ກໍໄດ້ມີຍຸດທະສາດກະກຽມມາກ່ອນໜ້າແລ້ວ ໂດຍສະເພາະແມ່ນຕິດຕາມລາຄາສິນຄ້າ, ການຄວບຄຸມລາຄາຊີ້ນໝູ ເຊິ່ງເລີ່ມປະຕິບັດມາຕັ້ງແຕ່ເດືອນພະຈິກປີ 2016 ຜ່ານມາ 5 ເມືອງຂອງນະຄອນຫຼວງວຽງຈັນ ໂດຍສະເພາະໃນຕະຫຼາດໃຫຍ່ໆ ເຫັນວ່າສາມາດປະຕິບັດຕາມແຈ້ງການຄື ບໍ່ໃຫ້ຂາຍເກີນລາຄາ ທີ່ລັດກຳນົດໄວ້ ສູງສຸດບໍ່ເກີນ 35 ພັນກີບ/ກິໂລກຣາມ