ເອເອຟພີລາຍງານ ເມື່ອວັນທີ 2 ເມສາ 2017 ຜ່ານມາວ່າ ທາງການອິນໂດເນເຊຍ ໄດ້ຈັດພິທີທຳລາຍເຮືອຕ່າງຊາດ 81 ລຳ ທີ່ລັກເຂົ້າໄປຫາປາຢ່າງຜິດກົດໝາຍໃນນ່ານນໍ້າ ຂອງປະເທດອິນໂດເນເຊຍ ເຮືອທີ່ຖືກທຳລາຍຫຼາຍທີ່ສຸດມາຈາກຫວຽດນາມ, ຟີລິບປິນ, ມາເລເຊຍ ແລະໄທ
ທາງການອິນໂດເນເຊຍໄດ້ບຸກຢຶດ ແລະທຳລາຍເຮືອໄດ້ໃນ 12 ນ່ານນໍ້າຈາກທົ່ວປະເທດ ເຊິ່ງນ່ານນໍ້ານາຕູນ່າ ບໍລິເວນໝູ່ເກາະຣີເອົາ ໃກ້ກັບລັດຊາຣາວັກ ຂອງປະເທດມາເລເຊຍ ທີ່ມີການຈັບ ແລະທຳລາຍເຮືອຫຼາຍທີ່ສຸດ 26 ລຳ ແລະອີກ 10 ລຳໃກ້ກັບທ່າເຮືອຂອງເມືອງຕາເຣມປາ ເຊິ່ງຕັ້ງຢູ່ບໍ່ໄກຈາກເກາະຣີເອົາຫຼາຍປານໃດ
ທ່ານນາງຊູຊີ ປຸດຈິອັສຕູຕິ ລັດຖະມົນຕີວ່າການກະຊວງກິດຈະການທາງທະເລ ແລະປະມົງ ກ່າວຂະນະທີ່ເຂົ້າເປັນສັກຂີພິຍານໃນການທຳລາຍເຮືອຜິດກົດໝາຍວ່າ ທາງອິນໂດເນເຊຍຢຶດໝັ້ນເລື່ອງອະທິປະໄຕ ແລະມຸ່ງຕໍ່ສູ້ກັບການປະມົງແບບຜິດກົດໝາຍ “ເຮົາຫວັງວ່າ ຊິໂນ່ (ຊື່ຂອງເຮືອລຳໜຶ່ງທີ່ຖືກທຳລາຍ) ຈະເປັນສັນຍາລັກຂອງໄຊຊະນະຕໍ່ການລຸກລໍ້າຫຼັງຈາກທີ່ພ່າຍແພ້ມາຫຼາຍປີ ໂດຍສະເພາະໃນນ່ານນໍ້າທາງອິນໂດເນເຊຍຕາເວັນອອກ”
ຕັ້ງແຕ່ ທ່ານ ໂຈໂກ ວິໂດໂດ ເຂົ້າມາດຳລົງຕຳແໜ່ງປະທານາທິບໍດີ ເມື່ອປີ 2014 ມີການອອກຄໍາສັ່ງໃຫ້ທໍາລາຍເຮືອ ທີ່ເຂົ້າມາຫາປາຢ່າງຜິດກົດໝາຍໄປແລ້ວ 317 ລຳ