ສຳນັກຂ່າວສານປະເທດລາວລາຍງານ ວັນທີ 31 ມີນາ 2017 ນີ້ ທີ່ກະຊວງປ້ອງກັນປະເທດ ໄດ້ຈັດພິທີ ປະດັບຫລຽນໄຊ ແລະ ມອບໃບຍ້ອງຍໍ ໃຫ້ແກ່ກົມກອງ ແລະ ພະນັກງານ-ລັດຖະກອນ ທີ່ມີຜົນງານດີເດັ່ນ ປະກອບມີ 32 ກົມກອງ 80 ທ່ານ, ໃນນັ້ນ ມີກົມກອງດີເດັ່ນ ໄດ້ຮັບຫລຽນໄຊ ພິລະອາດຫານ ຊັ້ນ I ມີ 1 ບໍລິສັດສະກາຍໂທລະຄົມ, ໄດ້ຮັບຫລຽນໄຊພິລະອາດຫານ ຊັ້ນ II ມີ 11 ກົມກອງ, 4 ບໍລິສັດ ແລະ ບຸກຄົນ 10 ທ່ານ, ໄດ້ຮັບຫລຽນໄຊພິລະອາດຫານຊັ້ນ III ມີ 12 ກົມກອງ ແລະ 2 ບໍລິສັດ, ໄດ້ຮັບຫລຽນໄຊແຮງງານຊັ້ນ II ມີ 1 ກົມກອງ ແລະ ບຸກຄົນ ມີ 10 ທ່ານ, ໄດ້ຮັບຫລຽນໄຊແຮງງານຊັ້ນ III ມີ 20 ທ່ານ, ໄດ້ຮັບຫລຽນກາແຮງງານ 10 ທ່ານ, ໄດ້ຮັບໃບຍ້ອງຍໍລັດຖະບານ 10 ທ່ານ, ໄດ້ຮັບໃບຍ້ອງຍໍ ກະຊວງປ້ອງກັນປະເທດ 10 ທ່ານ ແລະໄດ້ຮັບໃບຍ້ອງຍໍກົມໃຫຍ່ການເມືອງກອງທັບ 10 ທ່ານ ໂດຍເປັນກຽດປະດັບໂດຍ ທ່ານ ພົຕ ວິໄລ ຫລ້າຄໍາຟອງ ຮອງລັດຖະມົນຕີກະຊວງປ້ອງກັນປະເທດ.
ໃນພິທີດັ່ງກ່າວ, ທ່ານ ພົວ ແກ່ນຈັນ ນັນທະລັງສີ ຫົວໜ້າກົມ ພົວພັນຕ່າງປະເທດ ໄດ້ລາຍງານກ່ຽວກັບຜົນສຳເລັດ ການເປັນປະທານ ແລະ ເຈົ້າພາບຈັດກອງປະຊຸມ ລັດຖະມົນຕີ ປ້ອງກັນປະເທດອາຊຽນ ຄັ້ງທີ 10 ແລະ ບັນດາກອງປະຊຸມປີ່ນອ້ອມອື່ນໆ ທີ່ກະຊວງ ປ້ອງກັນປະເທດ ໄດ້ຮັບກຽດເປັນເຈົ້າພາບ ໃນປີທີ່ຜ່ານມາ.
ສິ່ງທີ່ພົ້ນເດັ່ນທີ່ສຸດ ທີ່ກະຊວງປ້ອງກັນປະເທດ ສາມາດຍາດມາໄດ້ຄື: ສາມາດລົງນາມຖະແຫລງການ ຂອງກອງປະຊຸມ ລັດຖະມົນຕີປ້ອງກັນປະເທດອາຊຽນ ຄັ້ງທີ 10 ພາຍໃຕ້ຄໍາຂວັນ “ສົ່ງເສີມການຮ່ວມມືວຽກງານ ປ້ອງກັນຊາດ ເພື່ອຄວາມເຂັ້ມແຂງ ຂອງປະຊາຄົມອາຊຽນ” ເຊິ່ງໄດ້ຮັບຮອງເອົາ 3 ເອກະສານສຳຄັນ ປະກອບມີ ຂໍ້ກໍານົດ ວ່າດ້ວຍສູນແພດທະຫານອາຊຽນ, ຂໍ້ກໍານົດ ວ່າດ້ວຍກອງກຳລັງ ກຽມພ້ອມຂອງອາຊຽນ ເພື່ອການຊ່ວຍເຫລືອ ມະນຸດສະທຳ ແລະບັນເທົາໄພພິບັດ, ຂໍ້ກຳນົດວ່າດ້ວຍສ້າງຕັ້ງຊ່ຽວຊານ ດ້ານຄວາມໜັ້ນຄົງ ທາງອິນເຕີເນັດ ໃນຂອບ ກອງປະຊຸມລັດຖະມົນຕີ ປ້ອງກັນປະເທດອາຊຽນບວກ, ສາມາດລົງນາມຖະແຫລງການ ຂອງກອງປະຊຸມ ຜູ້ບັນຊາການທະຫານສູງສຸດ ອາຊຽນ ຄັ້ງທີ 13 ພາຍໃຕ້ຄໍາຂວັນ “ ສົ່ງເສີມການຮ່ວມມືວຽກງານປ້ອງກັນຊາດ ເພື່ອຄວາມເຂັ້ມແຂງ ຂອງປະຊາຄົມອາຊຽນ” ເຊີ່ງໄດ້ຮັບຮອງເອົາ ແຜນງານ 2 ປີ ຂອງທະຫານອາຊຽນ 2016-2018, ສາມາດເຮັດສໍາເລັດໃນການຈັດກອງປະຊຸມບໍ່ເປັນທາງການ ລັດຖະມົນຕີປ້ອງກັນປະເທດອາຊຽນກັບ 4 ປະເທດບວກ ມີ ຈີນ, ລັດເຊຍ, ຍີ່ປຸ່ນ ແລະ ອາເມລິກາ, ເຊິ່ງເປັນຄັ້ງປະຫວັດສາດ ທີ່ບໍ່ເຄີຍມີມາກ່ອນ (ຜ່ານມາມີແຕ່ 2 ປະເທດ/ປີ) ຊຶ່ງເຮັດໃຫ້ 4 ປະເທດມະຫາອຳນາດດັ່ງກ່າວ ມີຄວາມເພິ່ງພໍໃຈຫລາຍ ແລະ ເຊື່ອໜັ້ນຕໍ່ບົດບາດ ຂອງກອງທັບປະຊາຊົນລາວ ຫລາຍຂຶ້ນກ່ວາເກົ່າ