ຕາມແຫຼ່ງຂ່າວ ໜັງສືພິມ ວຽງຈັນໃໝ່ ລາຍງານ ວັນທີ 29 ມີນາ 2017 ຜ່ານມາ ທີ່ໂຮງແຮມແລນມາກແມ່ຂອງລີເວີໄຊ ນະຄອນຫຼວງວຽງຈັນ ໄດ້ມີພິທີເຊັນສັນຍາຮ່ວມມືກໍ່ສ້າງ ໂຄງການເສັ້ນທາງເບຕົງເສີມເຫຼັກ ແຕ່ສີ່ແຍກໄຟແດງຕານມີໄຊ ຫາສາມແຍກສີເກີດ ລະຫວ່າງບໍລິສັດ ລ້ານຊ້າງຊີມັງລາວ ຈຳກັດ ຂອງກຸ່ມບໍລິສັດ YEIG ແລະ ກຸ່ມບໍລິສັດ ຕັງຈະເລີນ ຈຳກັດຜູ້ດຽວ (TCR) ຮ່ວມລົງນາມລະຫວ່າງທ່ານ ຢ້ຽນຢົງ ປະທານບໍລິສັດ YEIG ລ້ານຊ້າງຊີມັງລາວ ຈຳກັດ ແລະ ທ່ານ ຮົວ ແສງອາລຸນ ປະທານກຸ່ມບໍລິສັດ ຕັງຈະເລີນ ຈຳກັດຜູ້ດຽວ ມີທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງສອງຝ່າຍເຂົ້າຮ່ວມ.
ສຳລັບການລົງນາມຄັ້ງນີ້ ຈະກາຍເປັນການຮ່ວມມືທີ່ເປັນສັນຍະລັກ ແລະ ໃນອະນາຄົດ ເພື່ອໃຫ້ສອງຝ່າຍໄດ້ມີສ່ວນຮ່ວມ ໃນການກໍ່ສ້າງພື້ນຖານໂຄງລ່າງຂອງ ສປປ ລາວ ໃຫ້ຫຼາຍຂຶ້ນ ພ້ອມນັ້ນ ເພື່ອໃຫ້ຂະຫຍາຍພື້ນທີ່ຂອບການຮ່ວມມືທາງດ້ານໂຮງແຮມ ວັດສະດຸເຫຼັກກ້າ ການຈັດສັນທີ່ດິນ ລະບົບສາຍສົ່ງໄຟຟ້າ ແລະ ອື່ນໆ.
ໂຄງການກໍ່ສ້າງເສັ້ນທາງດັ່ງກ່າວ ເປັນໂຄງການບຸລິມະສິດຂອງລັດຖະບານ ໂດຍແມ່ນກຸ່ມບໍລິສັດ ຕັງຈະເລີນ ເປັນຜູ້ຮັບເໝົາ ແລະ ລົງທຶນກ່ອນໃນມູນຄ່າ 45 ລ້ານໂດລາສະຫະລັດ ຫຼື ປະມານ 370 ຕື້ກີບ ການລົງນາມຄັ້ງນີ້ ເພື່ອກໍ່ສ້າງໂຄງການລະດັບໜຶ່ງ (A Class) ທີ່ຈຳເປັນຂອງລັດຖະບານລາວ ຄືໂຄງການກໍ່ສ້າງເສັ້ນທາງເບຕົງ ທີ່ເປັນແກນກາງຈຸດເຊື່ອມຕໍ່ລະຫວ່າງເສັ້ນທາງເລກທີ 13 ເໜືອ ແລະ 13 ໃຕ້ ການຮ່ວມມືຂອງສອງບໍລິສັດ ກໍ່ເພື່ອເຮັດໃຫ້ໂຄງການສຳເລັດໂດຍໄວ ເຊິ່ງບໍລິສັດ ລ້ານຊ້າງຊີມັງລາວ ຈະຮ່ວມປະກອບສ່ວນທຶນທາງດ້ານວັດສະດຸກໍ່ສ້າງ ເປັນຕົ້ນ ການສະໜອງຜະລິດຕະພັນຊີມັງກາຊ້າງ ໃຫ້ແກ່ໂຄງການກໍ່ສ້າງເສັ້ນທາງທີ່ມີຄວາມຍາວ 9,37 ກິໂລແມັດ ແລະ ກວ້າງ 28 ແມັດ ປູດ້ວຍເບຕົງເສີມເຫຼັກໜາ 23 ຊັງຕີແມັດ ມີຄອງແລ່ນລົດ 6 ເລນ ມີດອນກາງພ້ອມໄຟເຍືອງທາງ ມີທາງຄົນຍ່າງ ແລະ ຮ່ອງລະບາຍນ້ຳສອງຟາກທາງ ໂຄງການໄດ້ລົງມືກໍ່ສ້າງມາແຕ່ທ້າຍປີ 2016 ແລະ ປັດຈຸບັນສຳເລັດ 15% ໜ້າວຽກແມ່ນວາງທໍ່ລະບາຍນ້ຳ ຍົກລະດັບໜ້າດິນ ແລະ ອື່ນໆ ແລະ ຄາດວ່າຈະໃຫ້ສຳເລັດທ້າຍປີ 2018 ທັງນີ້ ກໍ່ເພື່ອແນໃສ່ປັບປຸງພື້ນຖານໂຄງລ່າງ ຊຸກຍູ້ການພັດທະນາເສດຖະກິດ-ສັງຄົມໃຫ້ເປັນຮູບປະທຳ ແລະ ແກ້ໄຂບັນຫາການຈະລາຈອນທີ່ແອອັດ ໃນເຂດຕົວເມືອງນະຄອນຫຼວງວຽງຈັນ ແລະ ເຮັດໃຫ້ຄົມມະນາຄົມຂົນສົ່ງມີຄວາມສະດວກສະບາຍຍິ່ງຂຶ້ນ.