ສຳນັກຂ່າວຣອຍເຕີລາຍງານໃນວັນທີ 30 ມີນາ 2017 ຜ່ານມາວ່າ ຜົນການສຶກສາລ່າສຸດພົບວ່າກ່ຽວກັບມົນລະພິດທາງອາກາດ ທີ່ເກີດຈາກອຸດສະຫະກຳການຜະລິດເພື່ອສົ່ງອອກ ມີສ່ວນກ່ຽວຂ້ອງການຕາຍກ່ອນໄວອັນຄວນເຖິງ 7 ແສນກວ່າຄົນທົ່ວໂລກ ຊ່ວງເວລາພຽງ 1 ປີ ແລະຍັງສົ່ງຜົນກະທົບ ຕໍ່ການເປັນຢູ່ຂອງຜູ້ທີ່ຢູ່ອາໄສ ຢູ່ບໍລິເວນອ້ອມຮອບລັດສະໝີນັບພັນກິໂລແມັດ ຈາກບໍລິເວນທີ່ເປັນແຫຼ່ງຂອງມົນລະພິດ ແລະບ່ອນທີ່ຢູ່ໃກ້ຄຽງ
ຜົນການສຶກສາ ເຊິ່ງພິມອອກວາລະສານເນເຈີ ແລະໄດ້ເຜີຍອອກວັນທີ 29 ມີນາ 2017 ຜ່ານມາ ໄດ້ຍົກຕົວຢ່າງ ເຊັ່ນການປ່ອຍມົນລະພິດ ຈາກອຸດສະຫະກຳໃນຈີນ ທີ່ຜະລິດສິນຄ້າ ເພື່ອການສົ່ງອອກ ມີສ່ວນກ່ຽວຂ້ອງກັບການຕາຍຈາກພະຍາດຫົວໃຈ, ພະຍາດຫຼອດເລືອດສະໝອງ ແລະມະເຮັງປອດ ຂອງຄົນໃນສະຫະລັດອາເມລິກາເປັນຕົ້ນ
ການສຶກສາດັ່ງກ່າວ ເປັນລາຍງານທຳອິດທີ່ກ່ຽວຂ້ອງກັບການຕາຍ ກ່ອນໄວອັນຄວນຂອງຄົນໃນທົ່ວໂລກ ທີ່ກ່ຽວຂ້ອງກັບການຄ້າ ລະຫວ່າງປະເທດ ທີ່ມາຈາກການຮວບຮວມຂໍ້ມູນຈາກປີ 2007 ເຊິ່ງພົບວ່າ ມີຜູ້ເສຍຊີວິດທີ່ກ່ຽວກັບການຜະລິດສິນຄ້າໃນພູມິພາກໜຶ່ງ ເພື່ອບໍລິໂພກໃນອີກພູມິພາກໜຶ່ງຫຼາຍເຖິງ 762,000 ຄົນ ໂດຍຜົນການສຶກສາບອກວ່າ ການນຳເຂົ້າເຊິ່ງສິນຄ້າໃນລາຄາຖືກ ອາດຈະສົ່ງຜົນກະທົບຕໍ່ສິ່ງທີ່ມີຊີວິດບ່ອນອື່ນ ຫາກຕົ້ນທຶນໃນການຜະລິດຕໍ່າ ມາຈາກນະໂຍບາຍດ້ານມົນລະພິດທີ່ບໍ່ເຂັ້ມງວດ ແລະບໍ່ມີການຄວບຄຸມ