ຕາມການໃຫ້ສຳພາດຂອງທ່ານ ນາງ ຈັນນະພາ ວົງສະມໍຣະພູມ ປະທານບໍລິສັດ ຊີເອັນພີ ຂາເຂົ້າ-ຂາອອກ ຈຳກັດ ໃຫ້ສຳພາດວ່າ: ສຳລັບເຂດ ທີ່ທາງບໍລິສັດຈັດສັນ ມີເນື້ອທີ່ລວງຍາວປະມານ 500 ແມັດ ລຽບຕາມແຄມນ້າຂອງ ເຊິ່ງຈະໄດ້ຈັດສັນເປັນແຕ່ລະຈຸດຄື A,B,C,D… ຈະມີໂຊນທີ່ເປັນວີໄອພີ ແບບຄອບຄົວ, ໂຊນອາຫານ, ໂຊນຖ່າຍຮູບ, ໂຊນບັນເທິງ, ໂຊນກິລາ ແລະໂຊນຫຼິ້ນນໍ້າເຫຼົ່ານີ້ເປັນຕົ້ນ, ໃນງານຈະມີກິດຈະກຳຫຼາຍຢ່າງເຊັ່ນ: ຕົບພະຊາຍ, ຕີໄກ່, ກະຕໍ້ຫາດຊາຍ, ມວຍນໍ້າ ແລະກິລາພື້ນບ້ານອີກຫຼາຍຢ່າງ ເຊິ່ງແຕ່ລະປະເພດກິລາທາງບໍລິສັດ ໄດ້ວາງເງິນລາງວັນຊະນະເລີດໄວ້ທີ 5 ລ້ານກີບ, ພ້ອມນັ້ນຍັງຈະມີການຈັດຄອນເສີດ, ການວາງສະແດງສິນຄ້າ ແລະກິດຈະກຳອື່ນໆອີກ ເພື່ອຮ່ວມແຮງຮ່ວມໃຈກັນ ໃນການຊຸກຍູ້ສົ່ງເສີມ ຮີດຄອງປະເພນີອັນດີງາມຂອງລາວ ເຊີນຊວນພໍ່ແມ່ປະຊາຊົນ ໂດຍສະເພາະຊາວນະຄອນຫຼວງ ເຂົ້າຮ່ວມຊົມກິດຈະກຳດັ່ງກ່າວ ຕະຫຼອດໄລຍະປີໃໝ່ລາວປີນີ້ ສ່ວນປີ້ເຂົ້າຊົມນັ້ນແມ່ນ ຜູ້ລະ 10 ພັນກີບເທົ່ານັ້ນ

ສຳລັບການກໍ່ສ້າງຕົບແຕ່ງ ມາຮອດປະຈຸບັນສຳເລັດແລ້ວປະມານ 50% ໃນເນື້ອທີ່ທັງໝົດ 500 ແມັດ ໃຫ້ກາຍເປັນສະຖານທີ່ ຈັດກິດກະກຳຕ່າງໆໃນມື້ງານທີ 13 ຫາ 16 ເມສາ ທີ່ໃກ້ໆຈະມາເຖິງນີ້

ພ້ອມດຽວກັນນີ້ ຍັງເນັ້ນການຕົບແຕ່ງສະຖານທີ່ແບບຊົງລາວ ທີ່ແຕກຕ່າງຈາກປີຜ່ານມາ ທີ່ໄດ້ມີການສ້າງງານສີມື ປະຕິມາກຳຊາຍຂຶ້ນ ເຊິ່ງໄດ້ສ້າງແຮງຈູງໃຈ ໃຫ້ກັບນັກທ່ອງທ່ຽວທັງພາຍໃນ ແລະຕ່າງປະເທດ ໄດ້ເຂົ້າຊົມເປັນຈຳນວນຫຼາຍແສນ ສ່ວນຈຸດປະສົງຫຼັກແມ່ນຈະເນັ້ນສົ່ງເສີມຮີດຄອງປະເພນີລາວໃຫ້ສັງຄົົມລາວ ແລະຊາວຕ່າງຊາດໄດ້ເຫັນຄວາມອຸດົມສົມບູນທາງດ້ານຮີດຄອງປະເພນີ

ແຫຼ່ງຂ່າວ:ໜັງສືພິມ ເສດຖະກິດ-ການຄ້າ