ໃນວັນທີ 28 ມີນາ 2017 ຜ່ານມາ ທີ່ສາງຢາ ແລະອຸປະກອນການແພດ ກະຊວງສາທາລະນະສຸກ ໄດ້ມີພິທີມອບ-ຮັບຕຽງຄົນເຈັບ ຈາກສະມາຄົມມິດຕະພາບ ໄຊຕະມະ-ລາວ ໃຫ້ແກ່ກະຊວງ ສາທາລະນະສຸກ ໂດຍຜ່ານ ສະມາຄົມມິດຕະພາບລາວ – ຍີ່ປຸ່ນ ຕາງໜ້າ ມອບໂດຍ ທ່ານ ທາເກຊິ ຮິກິຮາລະ (Takeshi HIKIHARA) ປະທານສະມາຄົມ ມິດຕະພາບໄຊຕະມະ-ລາວ, ຕາງໜ້າຮັບໂດຍທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກິລາ, ປະທານສະມາຄົມ ມິດຕະພາບລາວ-ຍີ່ປຸ່ນ ແລະມອບຕໍ່ໃຫ້ທ່ານ ບຸນກອງ ສີຫາວົງ ລັດຖະມົນຕີກະຊວງ ສາທາລະນະສຸກ ໂດຍໃຫ້ກຽດເປັນສັກຂີພິຍານຂອງ ທ່ານ ທອງສິງ ທຳມະວົງ ອະດີດນາຍົກລັດ ຖະມົນຕີ, ທ່ານເອກອັກ ຄະລາຊະທູດຍີ່ປຸ່ນ ປະຈຳ ສປປລາວ, ແຂກຖືກເຊີນເຂົ້າຮ່ວມ.
ໃນການຊ່ວຍເຫຼືອຄັ້ງນີ້ ສະມາຄົມມິດຕະພາບຍີ່ປຸ່ນ- ລາວ ແຂວງໄຊຕະມະ ໄດ້ນຳເອົາ ຕຽງຄົນເຈັບຈຳນວນ 527 ຊຸດ ມູນຄ່າລວມ 350.000 ໂດລາ ສະຫະລັດ ແລະ ລັດຖະບານ ຍີ່ປຸ່ນໄດ້ຊ່ວຍເຫຼືອຄ່າຂົນສົ່ງ ມູນຄ່າ 150.000 ໂດລາສະຫະລັດ ເພື່ອມາມອບໃຫ້ກະຊວງ ສາທາລະນະສຸກ ເພື່ອໄປແຈກຢາຍ ແລະ ມອບຕໍ່ໃຫ້ບັນດາ ສຸກສາລາ, ໂຮງໝໍເມືອງ ແລະ ໂຮງໝໍແຂວງ ໃນທົ່ວປະເທດ. ທ່ານ ທາເກຊິ ຮິກິຮາລະ ຫວັງຢ່າງຍິ່ງວ່າບັນດາຕຽງຄົນເຈັບ ເຫຼົ່ານີ້ຈະຊ່ວຍປະກອບສ່ວນເຂົ້າ ໃນການປັບປຸງການບໍລິການສຸຂະພາບ ແລະ ຕອບສະໜອງ ອຸປະກອນທີ່ຍັງບໍ່ທັນພຽງພໍ ໃນເຂດຊົນນະບົດຂອງລາວ.
ໃນໂອກາດນີ້ ທ່ານ ບຸນກອງ ສີຫາວົງ ໄດ້ສະແດງຄວາມຂອບອົກ ຂອບໃຈມາຍັງສະມາຄົມມິດ ຕະພາບໄຊຕະມະ-ລາວ ແລະ ລັດຖະບານຍີ່ປຸ່ນ ທີ່ໄດ້ສະໜັບສະໜູນ ການຊ່ວຍເຫຼືອໃນຄັ້ງນີ້ ແລະຈະໄດ້ແຈກຢາຍ ແລະ ນຳໃຊ້ເຄື່ອງຊ່ວຍເຫຼືອດັ່ງກ່າວໃຫ້ ມີຜົນປະໂຫຍດສູງສຸດ.
ແຫຼ່ງຂ່າວ: ໜັງສືພິມ ປະຊາຊົນ