ສຳນັກຂ່າວສານປະເທດລາວ ລາຍງານ ໃນວັນທີ 27 ມີນາ 2017 ຜ່ານມາ ທີ່ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ, ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ສະເຕນ ອາ ແຮນເຊັນ (Stein R. HANSEN) ຜູ້ອໍານວຍການ ແລະຜູ້ຕາງໜ້າອົງການ ສປຊ ເພື່ອການພັດທະນາ ອຸດສາຫະກໍາ ຄົນໃໝ່ ປະຈໍາພາກພື້ນ, ທີ່ມີສໍານັກງານຕັ້ງຢູ່ ບາງກອກ, ປະເທດໄທ.
ໃນໂອກາດນີ້, ທ່ານ ທອງຜ່ານ ສະຫວັນເພັດ ໄດ້ສະແດງຄວາມຍິນດີ ແລະຄວາມຊົມເຊີຍຕໍ່ທ່ານ ສະເຕນ ອາ ແຮນເຊັນ ທີ່ໄດ້ຖືກແຕ່ງຕັ້ງມາເປັນ ຜູ້ອໍານວຍການ ແລະ ຜູ້ຕາງໜ້າອົງການ ສປຊ ເພື່ອການພັດທະນາ ອຸດສາຫະກໍາຄົນໃໝ່ ປະຈໍາພາກພື້ນ. ພ້ອມນັ້ນ, ຍັງໄດ້ສະແດງຄວາມຂອບໃຈ ຕໍ່ອົງການດັ່ງກ່າວ ທີ່ໄດ້ໃຫ້ຄວາມຮ່ວມມື ແລະ ຊ່ວຍເຫລືອ ສປປ ລາວ ໃນໄລຍະທີ່ຜ່ານມາ, ໂດຍສະເພາະ ແມ່ນການປະກອບສ່ວນ ເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ເປັນຕົ້ນ ການຍົກລະດັບພື້ນຖານໂຄງລ່າງ ທາງດ້ານຄົມມະນາຄົມ ເພື່ອໃຫ້ອຸດສາຫະກໍາ ການຜະລິດພາຍໃນປະເທດ ອອກສູ່ຕະຫລາດສາກົນໄດ້ງ່າຍຂຶ້ນ ແລະ ການຫລຸດຜ່ອນຜົນກະທົບ ທາງດ້ານສິ່ງແວດລ້ອມ ໂດຍການໃຊ້ ພະລັງງານທີ່ພຽງພໍ ແລະ ບໍ່ເປັນພິດອັນຕະລາຍ ຕໍ່ສະພາບແວດລ້ອມ ໃນຮູບແບບພະລັງງານທົດແທນ, ໃນນັ້ນມີ 5 ໂຄງການ ທີ່ກໍາລັງດໍາເນີນຢູ່ ແລະ 4 ໂຄງການທີ່ໄດ້ປະຕິບັດສໍາເລັດ ຢ່າງມີໝາກຜົນອັນດີ ໃນປີ 2015 ແລະ 2016 ທີ່ຜ່ານມາ.
ໃນໂອກາດອັນດຽວກັນ, ທ່ານ ສະເຕນ ອາ ແຮນເຊັນ ໄດ້ສະແດງຄວາມຂອບໃຈ ຕໍ່ການຕ້ອນຮັບ ອັນອົບອຸ່ນຂອງທ່ານ ຮອງລັດຖະມົນຕີ ແລະ ໃຫ້ຄໍາໝັ້ນສັນຍາ ທີ່ຈະສືບຕໍ່ໃຫ້ການຮ່ວມມື ສະໜັບສະໜູນ ລັດຖະບານ ສປປ ລາວ ໃນການຈັດຕັ້ງປະຕິບັດ ແຜນການຮ່ວມມື ລະຫວ່າງ ອົງການສະຫະປະຊາຊາດ ເພື່ອການພັດທະນາ ອຸດສາຫະກໍາ ແລະ ສປປ ລາວ ກໍຄືເປົ້າໝາຍການພັດທະນາ ແບບຍືນຍົງ ທີ່ຕິດພັນກັບວຽກງານຂອງອົງການ ໃຫ້ໄດ້ຮັບໝາກຜົນ.