ເອບີຊີນິວສ໌ ລາຍງານເມື່ອໃນວັນທີ 27 ມີນາ 2017 ນີ້ວ່າ ສຳນັກງານອຸຕຸນິຍົມວິທະຍາລັດຄວີນສແລນ (Queensland) ທາງພາກຕາເວັນອອກສ່ຽງເໜືອຂອງອອສເຕຣເລຍ ປະກາດເຕືອນໃຫ້ປະຊາຊົນໃນພື້ນທີ່ສ່ຽງໄພ ຕິດຊາຍຝັ່ງເລັ່ງອົບພະຍົບ ໄປສູນພັກອາໄສຊົ່ວຄາວ ພາຍໃນເວລາ 10:00 ໂມງ ໃນວັນຈັນນີ້ ກ່ອນພາຍຸໄຊໂຄລນ “ເດັບບີ” ຈະເຂົ້າຝັ່ງ ເຊິ່ງໜ່ວຍກູ້ໄພໄດ້ຮັບຄຳສັ່ງກຽມຮັບມືໄພພິບັດຂັ້ນຮ້າຍແຮງ
ຈາກການພະຍາກອນ ພາຍຸຈະມີຄວາມຮຸນແຮງເປັນໄຊໂຄລນລະດັບ 4 ຈາກທັງໝົດ 5 ລະດັບ ທີ່ມີຄວາມໄວລົມສູງສຸດ 260 ກິໂລແມັດ/ຊົ່ວໂມງ ຈະພັດຖະຫຼົ່ມສູ່ເມືອງທາວສະວິລ ໃນຊ່ວງເວລາ 02:00 ໂມງຂອງວັນທີ 27 ມີນາ ພາຍຸຢູ່ຫ່າງຈາກເມືອງທາວສະວິລ 405 ກິໂລແມັດແລ້ວ
ທາງດ້ານເຈົ້າໜ້າທີ່ຢ້ານວ່າ ພາຍຸເດັບບີ ອາດເປັນໄຊໂຄລນ ທີ່ມີຄວາມຮຸນແຮງທີ່ສຸດໃນຮອບ 6 ປີ ນັບຕັ້ງແຕ່ໄຊໂຄລນຍາຊີ ເມື່ອປີ 2011 ເຊິ່ງໄດ້ສ້າງຄວາມເສຍຫາຍຫຼາຍກວ່າ 800 ລ້ານດອນລາສະຫະລັດ
ທາງການທ້ອງຖິ່ນລັດຄວີນສະແລນບອກວ່າ ອິດທິພົນຂອງພາຍຸຈະເຮັດໃຫ້ເກີດຝົນຕົກແຮງ, ລົມພັດແຮງ ແລະສ່ຽງນໍ້າຖ້ວມກະທັນຫັນ ຈຶ່ງສັ່ງພັກໂຮງຮຽນຫຼາຍກວ່າ 25 ໂຮງຮຽນໃນໄລຍະຊົ່ວຄາວໃນຊ່ວງ 1-2 ວັນ ທີ່ພາຍຸມີຄວາມຮຸນແຮງສູງສຸດ, ພ້ອມສັ່ງໃຫ້ເຈົ້າໜ້າທີ່ໜ່ວຍສຸກເສີນ 1.000 ຄົນ, ຕຳຫຼວດ 100 ຄົນ ລວມເຖິງເຈົ້າໜ້າທີ່ດັບເພີງ ແລະທີມຕອບສະໜອງໄພພິບັດອີກ 71 ຄົນ ເພື່ອຊ່ວຍເຫຼືອຜູ້ປະສົບໄພໃຫ້ທົ່ວເຖິງ