ໃນວັນທີ 24 ມີນາ 2017 ຜ່ານມາ ທີ່ສຳນັກງານສູນກາງພັກ ກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 4 ສະໄໝທີ X ໄດ້ສຳເລັດຢ່າງຈົບງາມ ພາຍຫລັງທີ່ໄດ້ດຳເນີນກອງປະຊຸມມາ ເປັນເວລາ 5 ວັນ ໂດຍການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ. ກອງປະຊຸມໄດ້ຄົ້ນຄວ້າ ປຶກສາຫາຫລື ແລະໃຫ້ທິດຊີ້ນຳ ກ່ຽວກັນການຕີລາຄາການຜັນຂະຫຍາຍ ແລະຈັດຕັ້ງປະຕິບັດມະຕິກອງປະຊຸມສູນກາງຄົບຄະນະ ຄັ້ງທີ 3 ສະໄໝທີ X ແລະ ການປະຕິບັດວຽກງານຈຸດສຸມ ຂອງລັດຖະບານ ໃນໄລຍະ 6 ເດືອນຜ່ານມາ, ພ້ອມທັງຄົ້ນຄ້ວາເອກະພາບ ວາງທິດທາງວຽກງານໃນຕໍ່ໜ້າ, ຮັບຮອງບາງບັນຫາທີ່ສຳຄັນຕ່າງໆ
ໃນກອງປະຊຸມ ສະຫາຍ ບຸນຍັງ ວໍລະຈິດ ໄດ້ເນັ້ນວ່າ: ໃນໄລຍະຜ່ານມາ ພາຍໃຕ້ແນວທາງປ່ຽນແປງໃໝ່ຮອບດ້ານ ແລະມີຫລາຍຫລັກການຂອງພັກ ວຽກງານທີ່ດິນ ແລະວຽກງານສົ່ງເສີມທຸລະກິດຂອງພາກສ່ວນເສດຖະກິດຕ່າງໆ ກໍໄດ້ມີນະໂຍບາຍ ແລະໄດ້ຫັນເປັນນິຕິກຳ ເປັນລະບຽບ ພ້ອມທັງນຳພາຜັນຂະຫຍາຍຈັດຕັ້ງ ປະຕິບັດຕໍ່ເນື່ອງສົມຄວນ ເຮັດໃຫ້ວຽກງານທີ່ດິນກໍຄືວຽກງານສົ່ງເສີມວິສາຫະກິດຂະໜາດນ້ອຍ, ຂະໜາດກາງ ມີບົດບາດ ແລະ ປະກອບສ່ວນເຂົ້າ ໃນການຊຸກຍູ້ ການພັດທະນາເສດຖະກິດ-ສັງຄົມແຫ່ງຊາດ ສາມາດປົວແປງຊີວິດການເປັນຢູ່, ຍົກລະດັບລາຍໄດ້ ແລະ ແກ້ໄຂຄວາມຄວາມທຸກຍາກຂອງປະຊາຊົນ ໃຫ້ມີການຫັນປ່ຽນຢ່າງຈະແຈ້ງ. ແຕ່ພ້ອມກັນນັ້ນການຄຸ້ມຄອງ, ພັດທະນາທີ່ດິນ ກໍຄືການສົ່ງເສີມ, ຄຸ້ມຄອງ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ຢູ່ປະເທດເຮົາຜ່ານມາ ຍັງພົບກັບຄວາມຫຍຸ້ງຍາກອ່ອນແອ ແລະບໍ່ທັນເປັນລະບົບເທົ່າທີ່ຄວນ ເຊິ່ງກອງປະຊຸມຄັ້ງນີ້ ກໍໄດ້ມີຄວາມເປັນເອກະພາບສູງ ຕັດສິນໃຈສືບຕໍ່ນຳພາແກ້ໄຂບັນຫາຕ່າງໆ ໃຫ້ດີຂຶ້ນເປັນຮູບປະທຳ ແລະ ໄດ້ມອບໃຫ້ລັດຖະບານ ຮີບຮ້ອນຈັດຕັ້ງຜັນຂະຫຍາຍທິດຊີ້ນຳ ກ່ຽວກັບບັນຫາດັ່ງກ່າວ ໃຫ້ເປັນນິຕິກຳລະອຽດ ເຂົ້າສູ່ການຈັດຕັ້ງປະຕິບັດ ແລະມີປະສິດທິຜົນຕົວຈິງ. ພ້ອມດຽວກັນນີ້, ກອງປະຊຸມຍັງໄດ້ເຫັນດີ ເປັນເອກະພາບຮັບຮອງເອົາທິດທາງ, ວຽກງານຈຸດສຸມ ໃນແຕ່ລະຂົງເຂດວຽກງານ ກໍຄືການພັດທະນາເສດຖະກິດ-ສັງຄົມ, ສ້າງບາດລ້ຽວໃໝ່ໃນການນຳພາ ປະເທດຊາດ ຫລຸດພົ້ນອອກຈາກຄວາມດ້ອຍພັດທະນາ, ປັບປຸງຍົກສູງຄວາມສາມາດ ໃນການຊີ້ນຳ-ນຳພາຂອງຄະນະພັກ ກໍຄືປະສິດທິພາບ ໃນການບໍລິຫານລັດ, ຄຸ້ມຄອງເສດຖະກິດ-ສັງຄົມ ຂອງລັດຖະບານ ແລະອົງການປົກຄອງແຕ່ລະຂັ້ນ, ສຸມໃສ່ແກ້ໄຂບັນຫາເສດຖະກິດ ໃຫ້ມີຄວາມໝັ້ນທ່ຽງ, ແກ້ໄຂປະກົດການຫຍໍ້ທໍ້ຕ່າງໆ ໃນສັງຄົມ ແລະປັບປຸງປົວແປງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ.
ພ້ອມດຽວກັນ, ຄະນະບໍລິຫານງານສູນກາງພັກ ຍັງຮຽກຮ້ອງ ໃຫ້ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວບັນດາເຜົ່າ ຈົ່ງເຊີດຊູຈິດໃຈຮັກຊາດ, ເອກະລາດ, ເປັນເຈົ້າຕົນເອງ ຕັ້ງໜ້າປະກອບສ່ວນເຂົ້າ ໃນຂະບວນການຮັກຊາດ ແລະ ພັດທະນາ ຕິດພັນກັບການເຊື່ອມຊຶມ ແລະ ຜັນຂະຫຍາຍຈັດຕັ້ງປະຕິບັດຜົນສຳເລັດ ຂອງກອງປະຊຸມ ໃນຄັ້ງນີ້ ເຂົ້າສູ່ການກະທຳຕົວຈິງ, ນຳເອົາຜົນປະໂຫຍດຕົວຈິງ ມາໃຫ້ປະຊາຊົນ ແລະ ປະເທດຊາດ, ສ້າງການຫັນປ່ຽນ ທີ່ເປັນບາດລ້ຽວສຳຄັນ ໃນການປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ ໃຫ້ມີຜົນສຳເລັດ ແນ່ໃສ່ນຳພາປະເທດຊາດຫລຸດພົ້ນອອກຈາກຄວາມດ້ອຍພັດທະນາ.
ແຫຼ່ງຂ່າວ: ສຳນັກຂ່າວສານປະເທດລາວ