ໃນວັນທີ 23 ມີນາ 2017 ຜ່ານມານີ້ ໄດ້ມີພິທີຖະແຫລ່ງຂ່າວ ເປີດສວນພຶກສາ, ໂດຍເປັນກຽດເຂົ້າຮ່ວມ ຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ບັນດາຮອງລັດຖະມົນຕີ ແລະ ພາກສ່ວນກ່ຽວຂ້ອງເຂົ້າຮ່ວມ. ໃນພິທີໄດ້ມີພິທີທາງສາສະໜາ, ຕັກບາດ-ຢາດນ້ຳ, ຖວາຍສັງຄະທານ ເພື່ອເປັນສິລິມຸງຄຸນໃຫ້ກັບສວນດັ່ງກ່າວ ແລະ ໃຫ້ດຳເນີນໄປດ້ວຍຜົນສຳເລັດ.
ໃນໂອກາດດັ່ງກ່າວ, ທ່ານ ພູວົງ ພະມີສິດ ປະທານສວນພຶກສາກ່າວວ່າ: ຈຸດປະສົງຂອງການສ້າງສວນພຶກສາ ແມ່ນເພື່ອຢາກສ້າງແຫລ່ງທ່ອງທ່ຽວ ໃຫ້ນະຄອນຫລວງວຽງຈັນ ກໍຄືບ້ານໃໝ່ດ່ານຊີ ເມືອງນາຊາຍທອງ ໃຫ້ມີສະຖານທີ່ທ່ອງທ່ຽວເພີ່ມຂຶ້ນ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວ ສປປ ລາວ ຫລາຍຂຶ້ນ. ພ້ອມນັ້ນ, ສວນພຶກສາ ຍັງຈະສ້າງໃຫ້ເປັນບ່ອນສຶກສາຮຽນຮູ້ ທາງດ້ານກະສິກຳ ແລະປູກຝັງ-ລ້ຽງສັດຕື່ມອີກ.
ສວນພຶກສາ ຈະເປີດໃຫ້ບໍລິການ ໃນຕົ້ນເດືອນເມສາ 2017 ນີ້, ຢູ່ບ້ານໃໝ່ດ່ານຊີ ເມືອງນາຊາຍທອງ ນະຄອນຫລວງວຽງຈັນ ຫ່າງຈາກຕົວເມືອງປະມານ 20 ກວ່າກິໂລແມັດ ໄປຕາມເສັ້ນທາງເລກທີ 13 ເໜືອ ມີເນື້ອທີ່ທັງໝົດ 15 ເຮັກຕາ ເປັນສ່ວນທີ່ມີຄວາມສວຍງາມ, ມີດອກໄມ້ນາໆ ຊະນິດ, ພືດນາໆ ພັນ, ເປັນບ່ອນພັກຜ່ອນຢ່ອນອາລົມ, ມີຕູບ, ມີໜອງ, ມີອາຫານ ແລະ ເຄື່ອງດື່ມໄວ້ຄອຍບໍລິການ ດ້ວຍຄວາມເປັນກັນເອງ ຢ່າງໃດກໍຕາມ ສວນດັ່ງກ່າວ ຍັງບໍ່ທັນສຳເລັດ 100% ເທື່ອ ຄາດວ່າຈະໃຫ້ສຳເລັດສົມບູນ 100% ແລະ ເປີດໃຫ້ບໍລິການຢ່າງເປັນທາງການ ພາຍໃນເດືອນກັນຍາ 2017 ທີ່ຈະມາເຖິງນີ້.
ແຫຼ່ງຂ່າວ: ສຳນັກຂ່າວສານປະເທດລາວ