ໃນວັນທີ 23 ມີນາ 2017 ຜ່ານມາ ທີ່ບ້ານດົງໂພສີ ໄດ້ມີພິທີມອບ-ຮັບໂຄງການກໍ່ສ້າງໂຄງການກໍ່ສ້າງທາງລົດໄຟເຊື່ອມຕໍ່ລາວ-ໄທ ໄລຍະ II (ຕອນທີ 1) ຢ່າງເປັນທາງການ ເຊິ່ງຕັ້ງຢູ່ບ້ານດົງໂພສີ ເມືອງຫາດຊາຍຟອງ ແລະ ບ້ານນາຄວາຍໃຕ້-ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ໂດຍມີທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ນົບພະດົນ ເທບພິທັກ ເອກອັກຄະລາຊະທູດໄທ ປະຈຳລາວ, ທ່ານ ເນວິນ ສິນສິຣິ ປະທານອົງການ NEDA ພ້ອມດ້ວຍພະນັກງານ-ວິຊາການສອງຝ່າຍເຂົ້າຮ່ວມ.
ສຳລັບໂຄງການດັ່ງກ່າວ ໄດ້ຈັດຕັ້ງປະຕິບັດແຕ່ປີ 2013 ເປັນຕົ້ນມາ ແລະ ໄດ້ສໍາເລັດໃນທ້າຍເດືອນກັນຍາ 2015 ໃຊ້ເວລາການກໍ່ສ້າງ 24 ເດືອນ ໂດຍແມ່ນບໍລິສັດເສີມສະຫງວນກໍ່ສ້າງ ຈໍາກັດ ຂອງໄທ ເປັນຜູ້ຮັບເໝົາກໍ່ສ້າງ ດ້ວຍມູນຄ່າ 656 ລ້ານກວ່າບາດ ຫຼື ປະມານ 150 ຕື້ກີບ ເຊິ່ງໄດ້ຮັບທຶນສະໜັບສະໜູນຈາກ ອົງການຮ່ວມມືພັດທະນາເສດຖະກິດ ກັບປະເທດເພື່ອນບ້ານ (NEDA) ປະເທດໄທ ໃນນັ້ນເປັນເງິນຊ່ວຍເຫຼືອລ້າ 30% ແລະເງິນກູ້ຢືມດອກເບ້ຍຕ່ຳ 70%.
ສຳລັບໜ້າວຽກປະກອບມີ 4 ໜ້າວຽກໃຫຍ່ຄື: ກໍ່ສ້າງທາງລົດໄຟປະກອບມີລະບົບລາງຫຼີກຢູ່ສະຖານີທ່ານາແລ້ງ ລວມທັງຂະຫຍາຍລາງລົດໄຟ ເຖິງເດີ່ນເກັບມ້ຽນຕູ້ສິນຄ້າ ປັບປຸງຍົກລະດັບລະບົບສັນຍານ ແລະ ໂທລະຄົມມະນາຄົມຢູ່ສະຖານີທ່ານາແລ້ງ ປ່ຽນຈາກລະບົບທຳມະດາເປັນລະບົບຄວບຄຸມດ້ວຍຄອມພິວເຕີ ປັບປຸງລະບົບເດີ່ນເກັບມ້ຽນຕູ້ສິນຄ້າ ລວມເນື້ອທີ່ 38.000 ຕາແມັດ ແລະ ກໍ່ສ້າງອາຄານ 2 ຊັ້ນຫ້ອງການກົມທາງລົດໄຟ ພ້ອມດ້ວຍເຮືອນພັກພະນັກງານຢູ່ບ້ານຄຳສະຫວາດ.
ສຳລັບໂຄງການກໍ່ສ້າງທາງລົດໄຟເຊື່ອມຕໍ່ລາວ-ໄທ ໄລຍະ II (ຕອນທີ 2) ຄາດວ່າຈະໄດ້ເລີ່ມຈັດຕັ້ງປະຕິບັດ ໃນທ້າຍປີ 2017 ແລະ ໃຫ້ສໍາເລັດໃນໄຕມາດໜຶ່ງ ປີ 2020 ໃນມູນຄ່າ 997,4 ລ້ານບາດ ເຊິ່ງໜ້າວຽກປະກອບມີຂະຫຍາຍທາງລົດໄຟຈາກສະຖານີທ່ານາແລ້ງ ເຖິງສະຖານີວຽງຈັນທີ່ຕັ້ງຢູ່ບ້ານຄຳສະຫວາດ ມີຄວາມຍາວ 7,5 ກິໂລແມັດ ພ້ອມດ້ວຍສິ່ງອຳນວຍຄວາມສະດວກຄົບຊຸດຕື່ມອີກ.
ແຫຼ່ງຂ່າວ: ໜັງສືພິມ ວຽງຈັນໃໝ່