ແຫຼ່ງຂ່າວສຳນັກຂ່າວສານປະເທດລາວລາຍງານ ໃນວັນທີ 23 ມີນາ 2017ຜ່ານມາວ່າ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ຄະນະນັກສຶກສາອາສາສະໝັກ ແລະ ຄູອາຈານຈາກມະຫາວິທະຍາໄລເຕັກນິກງີອານ ສ ສິງກະໂປ ຈໍານວນ 58 ຄົນ ເຊິ່ງນໍາໂດຍທ່ານ ໂດມີນິກໂກ ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈໍາລາວ ໃນໂອກາດທີ່ເດີນທາງມາຊ່ວຍເຫລືອບັນດາໂຮງຮຽນຕ່າງໆຢູ່ເມືອງ ຫີນເຫີບ ແຂວງວຽງຈັນ ແລະ ເມືອງສີໂຄດຕະບອງ ນະຄອນຫລວງວຽງຈັນ.
ໂອກາດດຽວກັນນັ້ນ, ນາຍົກ ໄດ້ສະແດງຄວາມຊົມເຊີຍ ຍິນດີຕ້ອນຮັບ ຕໍ່ຄະນະນັກສຶກສາອາສາສະໝັກ ທີ່ໄດ້ປະກອບສ່ວນ ອັນເປັນປະໂຫຍດສໍາຄັນຫລາຍ ເຂົ້າໃນວຽກງານການສຶກສາຂອງລາວ ທັງເປັນການຮັດແໜ້ນ ສາຍພົວພັນມິດຕະພາບ ແລະ ການຮ່ວມມືທີ່ດີງາມ ລະຫວ່າງສອງປະເທດ ລາວ-ສິງກະໂປ ໃຫ້ນັບມື້ແໜ້ນແຟ້ນຍິ່ງຂຶ້ນ. ເຊິ່ງນັບຕັ້ງແຕ່ປີ 2008 ຮອດປັດຈຸບັນ ໄດ້ມີອາສາໝັກຊາວໜຸ່ມ ຈາກສິງກະໂປ ຫລາຍກວ່າ 1500 ຄົນ ເຂົ້າມາຊ່ວຍເຫລືອ ບັນດາໂຮງໂຮຽນ ແລະ ຊຸມຊົນຕ່າງໆ ເປັນຕົ້ນ ແມ່ນຢູ່ເມືອງ ຫີນເຫີບ ແຂວງວຽງຈັນ ໂດຍການສອນພາສາອັງກິດ, ຄອມພິວເຕີ, ການຮັກສາສິ່ງແວດລ້ອມ ແລະ ການປະກອບສ່ວນທຶນຮອນ ແລະ ເຫື່ອແຮງ ເພື່ອຊ່ວຍເຫລືອກໍ່ສ້າງໂຮງຮຽນ ຢູ່ ສປປ ລາວ. ນອກນີ້ ຍັງມີຄະນະອາສາສະໝັກແພດ ທີ່ເປັນຊ່ຽວຊານດ້ານການປິ່ນປົວຕາ, ແຂ້ວ, ຢາພື້ນເມືອງ ແລະ ອື່ນໆ.
ຈາກນັ້ນ, ຕາງໜ້າໃຫ້ຄະນະນັກສຶກສາ ໄດ້ສະແດງຄວາມຂອບໃຈ ຕໍ່ ທ່ານ ນາຍົກ ທີ່ໄດ້ສະຫລະເວລາອັນມີຄ່າ ຕ້ອນຮັບຢ່າງອົບອຸ່ນໃນຄັ້ງນີ້ ແລະ ໄດ້ມີໂອກາດຮຽນຮູ້ກ່ຽວກັບວັດທະນະທໍາ ແລະ ຮີດຄອງປະເພນີອັນດີງາມຂອງ ສປປ ລາວນຳອີກ ແລະຍັງຈະເອົາບົດຮຽນຄັ້ງນີ້ ໄປເຜີຍແຜ່ໃຫ້ຜູ້ທີ່ບໍ່ຮູ້ ໃຫ້ພາກັນສະໝັກເປັນອາສາສະໝັກມາຊ່ວຍລາວຫຼາຍຂຶ້ນກວ່າເກົ່າ