ພິທີມອບ-ຮັບສາລາຮັບແຂກ ວັດໄຫຫີນມີໄຊຍະລາມ ໄດ້ຈັດຂຶ້ນໃນຕອນເຊົ້າວັນທີ 15 ມີນາ 2017 ນີ້ ທີ່ວັດໄຫຫີນມີໄຊຍະລາມ ເມືອງແປກ ແຂວງຊຽງຂວາງ ໂດຍການເຂົ້າຮ່ວມຂອງ ພະອາຈານມະຫາ ຄຳມາ ປັນຍາວິຈິດ ຮອງປະທານອົງການ ພຸດທະສາສະໜາສຳພັນລາວ, ທ່ານສາດສະດາຈານ ປອ ສົມກົດ ມັງໜໍ່ເມກ ກຳມະການສູນກາງພັກ ເລຂາພັກແຂວງ ເຈົ້າ ແຂວງໆຊຽງຂວາງ, ທ່ານ ຫງວຽນ ດັກ ກວີ່ງ ຮອງ ເລຂາພັກຜູ້ປະຈຳການແຂວງເຊີນລາ ມີຄະນະປະຈຳພັກແຂວງ, ກຳມະການພັກແຂວງ ຫົວໜ້າພະແນກການກົມກອງອ້ອມຂ້າງອົງການຈັດຕັ້ງຕະຫຼອດຮອດພໍ່ແມ່ປະຊາຊົນພາຍໃນເທສະບານໂພນສະຫັວນເຂົ້າຮ່ວມ
ໂຄງການດັ່ງກ່າວເລີ່ມຈັດຕັ້ງປະຕິບັດມາແຕ່ເດືອນ ຕຸລາ 2016 ຮັບເໝົາກໍ່ສ້າງໂດຍບໍລິສັດຟຸກຟາດດາດຈຳກັດ ໂດຍການຊ່ວຍເຫຼືອລ້າຈາກແຂວງເຊີນລາ ສສ ຫວຽດນາມ ມູນຄ່າ 5 ຕື້ດົ່ງ ໃຫ້ກຽດມອບໂດຍທ່ານ ຫງວຽນ ດັກ ກວີ່ງ ຮອງເລຂາພັກ ຜູ້ປະຈຳການແຂວງເຊີນລາ ແລະຮັບໂດຍພະອາຈານ ວັນສົມ ພຸດດາ ວົງ ປະທານອົງການພຸດທະສາ ສະໜາສຳພັນລາວແຂວງຊຽງຂວາງ, ແຕ່ກ່ອນປີ 1964 ສະຖານທີ່ວັດແຫ່ງນີ້ ມີວັດສີອ່າງຕັ້ງຢູ່, ເຊິ່ງເປັນວັດທີ່ໃຫຍ່ມີຊື່ສຽງ ແລະ ສັກສິດທີ່ຊາວຊຽງຂວາງ ເຄີຍເຄົາລົບບູຊາມາແຕ່ດົນນານ, ແຕ່ເມື່ອປາງສົງຄາມ ຖືກສົງຄາມທຳລາຍຢ່າງໝົດກ້ຽງຍັງເຫຼືອໄວ້ແຕ່ຮ່ອງຮອຍ ຂອງວັດເທົ່ານັ້ນ, ຍ້ອນເຫັນໄດ້ ເຖິງຄວາມສຳຄັນທາງດ້ານວັດທະນະທຳອັນດີງາມ ທີ່ປະຊາຊົນເຄີຍເຄົາລົບນັບຖືການນຳແຂວງຊຽງຂວາງ ຈິ່ງໄດ້ປຶກສາກັບເຖົ້າແກ່ແນວໂຮມ, ຜູ້ຊົງຄຸນວຸດທິ, ອົງການພຸດທະສາສະໜາສຳພັນລາວ ແລະ ຜູ້ທີ່ມີຈິດໃຈເຫຼື້ອມ ໃສສັດທາທັງຫຼາຍກໍ່ສ້າງວັດໄຫຫີນມີໄຊຍະລາມນີ້ຂຶ້ນໃໝ່ ແທນວັດສີອ່າງທີ່ຖືກສົງຄາມທຳລາຍໃນປາງສົງຄາມ.
ແຫຼ່ງຂ່າວ: ໜັງສືພິມ ກອງທັບປະຊາຊົນລາວ