ຊີເອັນເອັນລາຍງານເມື່ອວັນທີ 21 ມີນາ 2017 ຜ່ານມາວ່າ ບໍລິສັດ ໂວດາໂຟນ ກຣຸບ ອິນເດຍ ເຊິ່ງເປັນບໍລິສັດ ໃນສາຂາເຄື່ອຂ່າຍໂທລະສັບລາຍໃຫຍ່ໃນອັງກິດ ໄດ້ຮ່ວມຕົວກັບເຄືອຂ່າຍມືຖືລາຍໃຫຍ່ສັນຊາດອິນເດຍ ເພື່ອຈັດຕັ້ງບໍລິສັດເຄືອຂ່າຍມືຖືທີ່ໃຫຍ່ທີ່ສຸດ ໃນປະເທດອິນເດຍ

ໃນວັນຈັນຜ່ານມາ ທາງບໍລິສັດ ໂວດາໂຟນ ໄດ້ເວົ້າວ່າ ບໍລິສັດໄດ້ຮ່ວມກັບ ເຄືອຂ່າຍມືຖືທ້ອງຖິ່ນທີ່ສຳຄັນຄື ໄອເດຍ ເຊລລູລາ ເຊິ່ງຜົນດັ່ງກ່າວຄາດວ່າຈະເຮັດໃຫ້ມີລູກຄ້າຫຼາຍເຖິງ 400 ລ້ານຄົນ ຈຶ່ງເປັນການແຂ່ງຂັນທີ່ສຳຄັນ ໃນປະເທດທີ່ມີປະຊາກອນເປັນອັນດັບ 2 ຂອງໂລກ

ການລົງທຶນຄັ້ງນີ້ ໂວດາໂຟນ ໄດ້ເຂົ້າຖືຮຸ້ນໃຫຍ່ 45% ຄາດວ່າຈະເຮັດໃຫ້ບໍລິສັດດັ່ງກ່າວ ມີມູນຄ່າສູງເຖິງ 2.3 ໝື່ນລ້ານໂດລາສະຫະລັດ, ເຄືອຂ່າຍມືຖືສັນຊາດອັງກິດບອກວ່າ ຈະເປັນການບໍລິຫານງານຮ່ວມກັນລະຫວ່າງ ໂວດາໂຟນ ແລະເຈົ້າຂອງໄອເດຍ ເຊລລູລາ