ໃນອາທິດຜ່ານມານີ້ ທີ່ຫ້ອງປະຊຸມເຂດເສດຖະກິດພິເສດສະຫວັນ-ເຊໂນ ໄດ້ມີກອງປະຊຸມປະເມີນ ຄວາມເປັນໄປໄດ້ໃນການສ້າງນ້ຳປະປາ ເພື່ອສະໜອງໃຫ້ແກ່ ບໍລິສັດທີ່ມາລົງທຶນໃນເຂດເສດຖະກິດພິເສດສະຫວັນ-ເຊໂນ ແລະ ປະຊາຊົນບ້ານໃກ້ຄຽງ ໂດຍການເປັນປະທານຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ແລະມີພາກສ່ວນກ່ຽວຂ້ອງເຂົ້າຮ່ວມ.
ຕາມການລາຍງານຜົນ ການສຳຫຼວດ-ອອກແບບເບື້ອງຕົ້ນຂອງບໍລິສັດ ສວນທູນໄຊ ຈຳກັດ ໃນການກໍ່ສ້າງນ້ຳປະປາໄດ້ໃຫ້ຮູ້ວ່າ: ໂຄງການການສ້າງນໍ້າປະປານີ້ ຕັ້ງຢູ່ເຂດບ້ານນາຈະຫຼີດ ເມືອງໄກສອນພົມວິຫານ ແລະ ສ່ວນໜຶ່ງຂອງເມືອງອຸທຸມ ພອນ ເສັ້ນທາງເລກ 9, ກິໂລແມັດທີ 25, ຈຸດປະສົງຂອງໂຄງການ ກໍເພື່ອຕອບສະໜອງນ້ຳສະອາດ ໃຫ້ປະຊາຊົນໄດ້ນຳໃຊ້ຢ່າງພຽງພໍ, ປອດໄພ, ອີກຢ່າງກໍເພື່ອ ເປັນການປະກອບສ່ວນພັດທະນາພື້ນຖານໂຄງລ່າງ ໃນການພັດທະນາເສດຖະກິດ-ສັງຄົມ ຂອງແຂວງຕື່ມອີກ.ໃນນັ້ນກຸ່ມ ເປົ້າໝາຍປະກອບມີ 9 ເຂດຄື: ເຂດບ້ານດົງບັງ, ຍາງໂພສີ, ເຄືອເຂົາກາດ, ນາຈະຫຼີດ, ນາທາດ, ສວນທູນໄຊ, ເຊໂນ, ເຂດພັດທະນາເຊໂນໂຊນ B ແລະ B1 ຊຶ່ງມີປະຊາກອນ ທັງໝົດເກືອບ 20 ພັນຄົນ.
ໂຄງການນ້ຳປະປາແຫ່ງນີ້ ຈະໃຊ້ແຫຼ່ງນ້ຳຊົນລະປະທານທີ່ທາງບໍລິສັດ ໄດ້ສ້າງຂຶ້ນ, ຈາກນັ້ນຈະໄດ້ ສ້າງສະຖານີສູບນ້ຳ, ອ່າງພັກນ້ຳ, ອ່າງປະສົມ, ອ່າງນ້ຳນອນ, ອ່າງຕອງ ແລະ ເຮືອນໂປມ, ອ່າງເກັບນ້ຳສະອາດ, ເຮືອນໂປມສົ່ງນ້ຳ, ອ່າງເກັບນ້ຳສູງ, ເຮືອນປະສົມສານສົ້ມ, ເຮືອນ ປະສົມຢາຂ້າເຊື້ອ, ສ້າງລະບົບ ທໍ່ແຈກ, ທໍ່ສົ່ງ ແລະ ທໍ່ສົ່ງນ້ຳດິບ ລວມມູນຄ່າການກໍ່ສ້າງທັງ ໝົດ 9 ລ້ານກວ່າໂດລາສະຫະລັດ ຫຼືປະມານ 72 ຕື້ກີບ ຊຶ່ງແມ່ນບໍລິສັດລົງທຶນ 100%.
ໃນໂອກາດນີ້ ທ່ານເຈົ້າແຂວງ ພ້ອມດ້ວຍບັນດາຜູ້ເຂົ້າຮ່ວມ ກໍໄດ້ປະກອບຄຳຄິດຄຳເຫັນ ແລະ ເປັນເອກະພາບ ພ້ອມ ທັງຊຸກຍູ້ໃຫ້ບໍລິສັດສວນທູນ ໄຊ ຈຳກັດ ປະຕິບັດໂຄງການ ດັ່ງກ່າວນີ້ ໃຫ້ສຳເລັດຕາມ ແຜນທີ່ວາງໄວ້ ເພື່ອສ້າງສິ່ງ ອຳນວຍຄວາມສະດວກໃຫ້ແກ່ ບໍລິສັດທີ່ເຂົ້າມາລົງທຶນໃນເຂດ ເສດຖະກິດພິເສດສະຫວັນ-ເຊ ໂນ ໄດ້ນຳໃຊ້ນ້ຳຢ່າງພຽງພໍ ໃນການດຳເນີນກິດຈະການ, ເຮັດໃຫ້ປະຊາຊົນໃນເຂດເມືອງ ໄກສອນ ພົມວິຫານ ແລະ ເທດ ສະບານເມືອງອຸທຸມພອນ ໄດ້ ນຳໃຊ້ນ້ຳປະປານຳພ້ອມ.
ແຫຼ່ງຂ່າວ: ໜັງສືພິມ ປະຊາຊົນ