ເກີດເຫດເຮືອບິນໂດຍສານຕົກໃນພາກຕາເວັນຕົກສ່ຽງເໜືອຂອງປະເທດຊູດານໃຕ້ ເມື່ອວັນຈັນ ວັນທີ 20 ມີນາ 2017 ທີ່ຜ່ານມາ (ຕາມເວລາໃນທ້ອງຖິ່ນ) ເນື່ອງຈາກໝອກລົງໜັກ ແນວໃດກໍຕາມຍັງເຄາະດີທີ່ບໍ່ມີຜູ້ໃດເສຍຊີວິດໃນເຫດການນີ້ຈັກຄົນເລີຍ.
ສຳນັກຂ່າວຕ່າງປະເທດລາຍງານວ່າ ເກີດເຫດເຮືອບິນໂດຍສານຂະໜາດນ້ອຍຟາດໃສ່ພື້ນໃນເວລາລົງຈອດ ທ່າມກາງສະພາບອາກາດທີ່ບໍ່ດີ ທີ່ສະໜາມບິນໃນເມືອງວາອູ ທາງຕາເວັນຕົກສຽງເໜືອຂອງປະເທດຊູດານໃຕ້ ເຮັດໃຫ້ມີຜູ້ໄດ້ຮັບບາດເຈັບເປັນຈຳນວນຫຼາຍ ແຕ່ບໍ່ມີຜູ້ໃດເສຍຊີວິດ.
ຕາມການເປີດເຜີຍຂອງທ່ານອາເຕນີ ເວກ ອາເຕນີ ໂຄສົກປະທານາທິບໍດີຊູດານໃຕ້ ເຮືອບິນລຳນີ້ເດິນທາງຈາກນະຄອນຫຼວງຈູບາພ້ອມຜູ້ໂດຍສານແລະຈຸບິນ 43 ຄົນ ເຖິງເມືອງວາອູປະມານເວລາ 14:00 ຕາມເວລາທ້ອງຖິ່ນ ໂດຍຂະນະທີ່ນັກບິນເອົາເຮືອບິນລົງຈອດເກີດໝອກລົງໜັກ ເຮັດໃຫ້ນັກບິນກະເປົ້າໝາຍເທິງລັນເວຜິດພາດ ຈົນເຮືອບິນຕົກຟາດພື້ນແລະເກີດໄຟລຸກໄໝ້.
ດ້ານທ່ານໂບດ ວານ ອາເຊງ ເຈົ້າໜ້າທີ່ຂອງສາຍການບິນ ເຊົາທ໌ ຊູພຣີມ ກ່າວວ່າ ໄຟລຸກໄໝ້ເຮັດໃຫ້ຕອນທຳອິດບໍ່ມີໃຜເຊື່ອວ່າຈະມີຜູ້ລອດຊີວິດ ແນວໃດກໍຕາມ ຜູ້ໂດຍສານແລະຈຸບິນພັດລອດຊີວິດໄດ້ຢ່າງປາຕິຫານ ໂດຍມີຜູ້ບາດເຈັບ 25 ຄົນ ຕ້ອງເຂົ້າຮັບການປິ່ນປົວຢູ່ໂຮງໝໍ ແລະອີກ 18 ຄົນປອດໄພດີ.