ໃນວັນທີ 17 ມີນາ 2017 ຜ່ານມາ ທີ່ຫ້ອງຮັບແຂກສະພາແຫ່ງຊາດ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ໂຄອິຈິໂຣ ໂຢະໂກ ຜູ້ອຳນວຍການອາວຸໂສກົມນະໂຍບາຍສາທາລະນະ ແລະການພັດທະນາອຸດສາຫະກຳ ສຳນັກງານອົງການຮ່ວມມືຍີ່ປຸ່ນ.
ໃນໂອກາດດຽວກັນນີ້ ທ່ານ ນາງ ປານີ ຢາທໍ່ຕູ້ ກໍໄດ້ສະແດງຄວາມຕ້ອນຮັບຊົມເຊີຍຕໍ່ ທ່ານ ໂຄອິຈິໂຣ ໂຢະໂກ ພ້ອມດ້ວຍຄະນະ ທີ່ໄດ້ມາຢ້ຽມຢາມ ແລະເຮັດວຽກຢູ່ ສປປ ລາວ, ຊຶ່ງເປັນການປະກອບສ່ວນ ເພີ່ມພູນຄູນສ້າງສາຍພົວພັນ ມິດຕະພາບ ແລະ ການຮ່ວມມື ທີ່ເຄີຍມີມາແຕ່ດົນນານ ລະຫວ່າງລາວ-ຍີ່ປຸ່ນ ໃຫ້ແໜ້ນ ແຟ້ນຍິ່ງໆຂຶ້ນ.
ທ່ານ ໂອອິຈິໂຣ ໂຢະໂກ ຕາງໜ້າຄະນະ ໄດ້ສະແດງຄວາມຂອບໃຈຕໍ່ທ່ານ ນາງ ປານີ ຢາທໍ່ຕູ້ ທີ່ໄດ້ຕ້ອນຮັບຢ່າງອົບອຸ່ນ, ພ້ອມທັງແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃຫ້ກັບທ່ານ ນາງ ປານີ ຢາທໍ່ຕູ້ ໄດ້ຮັບຊາບ
ແຫຼ່ງຂ່າວ: ໜັງສືພິມ ປະຊາຊົນ