ບີບີຊີລາຍງານເມື່ອວັນທີ 15 ມີນາ 2017 ຜ່ານມາວ່າ ປະຈຸບັນ ປະເທດນອກແວ ກຳລັງພະຍາຍາມທີ່ຈະສ້າງອຸໂມງສຳລັບເຮືອແລ່ນຜ່ານ ບ່ອນທຳອິດຂອງໂລກ ເຊິ່ງຄາດວ່າຈະມີເຮືອໃຊ້ອຸໂມງນີ້ເຖິງ 70-120 ລໍາຕໍ່ວັນ, ເຊິ່ງປະຊາຊົນເລີ່ມສະໜັບສະໜູນ ໃຫ້ມີການສ້າງອຸໂມງດັ່ງກ່າວຕັ້ງແຕ່ປີ 1980 ເຊິ່ງໜ່ວຍງານບໍລິຫານຊາຍຝັ່ງນອກແວ ກໍໄດ້ສຶກສາຄວາມເປັນໄປໄດ້ຂອງການສ້າງອຸໂມງດັ່ງກ່າວ
ສຳລັບອຸໂມງດັ່ງກ່າວ ຈະຕັ້ງຢູ່ທະເລ Stadhavet ເຊິ່ງເປັນບໍລິເວນທີ່ມີລົມພັດແຮງ ແລະເກີດພາຍຸເຮີລິເຄນຂຶ້ນຕະຫຼອດ ເຮັດໃຫ້ເປັນໄປບໍ່ໄດ້ເລີຍວ່າ ຈະມີເຮືອມາທ່ອງທ່ຽວໃນນ່ານນໍ້າບໍລິເວນນີ້ ເຊິ່ງເຮືອຫຼາຍລຳຕ້ອງຈອດຢູ່ນອກນ່ານນໍ້າຫຼາຍຊົ່ວໂມງ ຫຼືຫຼາຍວັນ ເພື່ອລໍຖ້າພາຍຸສະຫງົບ ເຊິ່ງການສ້າງອຸໂມງ ຈະຊ່ວຍໃຫ້ຜູ້ໂດຍສານເຮືອ ສາມາດເດີນທາງເຂົ້າມາໃນທະເລນີ້ໄດ້ຢ່າງປອດໄພ
ໜ່ວຍງານບໍລິຫານຊາຍຝັ່ງນອກແວ ຄາດວ່າອຸໂມງດັ່ງກ່າວ ຈະມີຄວາມຍາວປະມານ 1 ກິໂລແມັດ ສູງປະມານ 45 ແມັດ ຫຼື 148 ຟຸດ ແລະກວ້າງປະມານ 35 ແມັດ ຫຼື 118 ຟຸດ ຮັບຮອງເຮືອໄດ້ປະມານ 70-120 ລໍາ/ວັນ
ທ່ານ ເທີເຈ ແອນເດຣີເຊນ ຜູ້ຈັດການໂຄງການສ້າງອຸໂມງດັ່ງກ່າວເວົ້າວ່າ ຄາດວ່າຫາກສາມາດສ້າງໄດ້ແທ້ ຈະໃຊ້ງົບປະມານທັງໝົດ 117 ລ້ານດອນລາສະຫະລັດ ແລະຖ້າກະຊວງຫາກຕົກລົງໃຫ້ສ້າງ ຈະເລີ່ມລົງມືກໍ່ສ້າງໃນຕົ້ນປີ 2017