ໃນຕອນບ່າຍຂອງວັນທີ 17 ມີນາ 2017 ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມກອງປະຊຸມຄົບຄະນະບໍລິຫານງານພັກ ຮ່ວມກັບອົງການປົກຄອງນະຄອນຫຼວງວຽງຈັນ ຄັ້ງທີ 8 ສະໄໝທີ VI ຂຶ້ນເຊິ່ງເປັນປະທານໂດຍ ທ່ານ ປອ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ມີບັນດາຄະນະປະຈໍາພັກ-ຄະນະພັກ, ຄະນະປົກຄອງນະຄອນຫຼວງວຽງຈັນ, ພະແນກການ ແລະພະນັກງານຫຼັກແຫຼ່ງ ເຂົ້າຮ່ວມ ຢ່າງພ້ອມພຽງ.
ໂອກາດນີ້, ທ່ານ ປອ. ສິນລະວົງ ຄຸດໄພທູນ ກໍ່ໄດ້ລາຍງານສະພາບລວມ ຂອງນະຄອນຫຼວງວຽງຈັນ ໃນປີ 2016 ທີ່ພົ້ນເດັ່ນ ແມ່ນການລົງທຶນ ທີ່ມີມູນຄ່າສູງເຖິງ 36,9 ພັນຕື້ກີບ, ຈັງຫວະການເຕີບໂຕທາງດ້ານເສດຖະກິດ (GDP) ຢູ່ໃນລະດັບ 10,9. ໃນນັ້ນ, ຫຼາຍກວ່າໝູ່ ແມ່ນດ້ານອຸດສາຫະກຳ 47 ຂອງ GDP, ການບໍລິການ 36% ແລະກະສິກຳ 17, ສະເລ່ຍລາຍຮັບ 4.700 ໂດລາສະຫະລັດຕໍ່ຄົນຕໍ່ປີ, ສາມາດເກັບລາຍຮັບໄດ້ກວ່າ 11 ພັນຕື້ກີບ; ນອກຈາກນັ້ນ, ຍັງໄດ້ເອົາໃຈໃສ່ເຂົ້າໃນການພັດທະນາ ດ້ານວັດທະນະທຳ-ສັງຄົມ, ການບໍລິຫານລັດ, ການພັດທະນາຕົວເມືອງ ແລະ ເຂດຊານເມືອງ, ການປ້ອງກັນຊາດ-ປ້ອງກັນຄວາມສະຫງົບ, ປັບປຸງລະບົບການເມືອງ ແລະ ກໍ່ສ້າງພັກ-ພະນັກງານ ຢ່າງມີຈຸດສຸມ.
ພ້ອມດຽວກັນນີ້, ນາຍົກ ກໍ່ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຄວາມບຸກໜ້າບືນຕົວ, ຄວາມ ພະຍາຍາມ ຂອງບັນດາການນຳ ແລະປະຊາຊົນຊາວນະຄອນຫຼວງວຽງຈັນ ທີ່ໄດ້ເປັນເຈົ້າການ, ມີຄວາມສາມັກຄີ ເປັນຈິດໜຶ່ງໃຈດຽວກັນ ພ້ອມພາກັນພັດທະນານະຄອນຫຼວງ ກ້າວຂຶ້ນຢ່າງບໍ່ຢຸດຢັ້ງ ກໍ່ຄືຜົນສຳເລັດໃນການພັດທະນານະຄອນຫຼວງວຽງຈັນ ໃນໄລຍະຜ່ານມາ, ດ້ານດີ-ດ້ານອ່ອນ ແລະ ທິດທາງໜ້າທີ່ລວມຂອງນະຄອນຫຼວງວຽງຈັນ ໂດຍສະເພາະ ໄດ້ຕັ້ງໜ້າປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ກໍ່ຄືຂອງນະຄອນຫຼວງ, ການກຳນົດວິໄສທັດ ຮອດປີ 2030, ຍຸດທະສາດການພັດທະນາເສດຖະກິດ-ສັງຄົມ ໄລຍະ 10 ປີ (2016-2025) ເຮັດໃຫ້ ເສດຖະກິດຂອງນະຄອນຫຼວງ ສືບຕໍ່ຂະຫຍາຍຕົວຢ່າງຕໍ່ເນື່ອງ; ການຈັດຕັ້ງ ແລະ ປະຊາຊົນຊາວນະຄອນຫຼວງ ມີຄວາມຫ້າວຫັນ, ມີຄວາມກະຕືລືລົ້ນ ປະກອບສ່ວນຢ່າງຕັ້ງໜ້າ ເຂົ້າໃນການຮັບໃຊ້ກອງ ປະຊຸມລະດັບສາກົນຕ່າງໆ ທີ່ ສປປ ລາວ ເປັນເຈົ້າພາບ ຈົນປະສົບຜົນສຳເລັດເປັນຢ່າງດີ. ນອກນັ້ນ ທ່ານນາຍົກຍັງເນັ້ນໃຫ້ນະຄອນຫຼວງວຽງຈັນເອົາໃຈໃສ່ການປັບປຸງກົນໄກ, ປັບປຸງຄົນ ແລະປັບປຸງເຕັກໂນໂລຊີອັນໃໝ່ ເຂົ້າໃນການເກັບລາຍຮັບ, ບຸກບືນສຸມໃສ່ ແກ້ໄຂໜີ້ສິນສາທາລະນະ ໄປຕາມທິດທາງນະໂຍບາຍ ທີ່ໄດ້ວາງໄວ້, ການແກ້ໄຂບັນຫາທີ່ດິນ ແລະ ອື່ນໆ ເພື່ອເຮັດໃຫ້ການເກັບລາຍຮັບ ມີຄວາມໂປ່ງໃສ ແລະ ເຂົ້າເຖິງຖານລາຍຮັບຕົວຈິງ
ແຫຼ່ງຂ່າວ: ຫ້ອງວ່າການສຳນັກງານນາຍົກລັດຖະມົນຕີ