ສຳນັກຂ່າວເອເອຟພີລາຍງານເມື່ອວັນທີ 17 ມີນາ 2017 ຜ່ານມາວ່າ ທີມນັກວິທະຍາສາດອາເຈນຕິນາ ແລະບຣາຊິລ ປະຈຳພິພິທະພັນທຳມະຊາດ ວິທະຍາເບີນາດິໄນຣິວາເດວາ ໃນນະຄອນບົວໂນສໄອເຣສ ປະເທດອາເຈນຕິນາ ໄດ້ເປີດເຜີຍ ການຄົ້ນພົບ ກົບເຮືອງແສງເອງຕາມທຳມະຊາດຄັ້ງທຳອິດ ເຊິ່ງພວກເຂົາພົບໂດຍບັງເອີນໃນປະເທດອາເຈນຕິນາເມື່ອໃກ້ໆນີ້, ລະຫວ່າງກຳລັງສຶກສາສານກຳເນີດສີ ທີ່ມາຈາກຂະບວນການເຜົາຜານອາຫານ ໃນກົບ 3 ສາຍພັນທີ່ພົບໂດຍທົ່ວໄປໃນອາເມລິກາໃຕ້, ພາຍໃຕ້ແສງປົກກະຕິ ຜິວໜັງໃສໆ ຂອງກົບເຮືອງແສງ ທີ່ພົບຈະເປັນສີນໍ້າຕານເຫຼືອງ ແລະລາຍຈຸດສີແດງ, ແຕ່ເມື່ອນັກວິທາະຍສາດສາຍແສງອັລຕຣາໄວໄອເລັດເຂົ້າໄປ ສີຜິວຂອງກົບດັ່ງກ່າວກັບເຮືອງແສງເປັນສີຂຽວສົດໃສຂຶ້ນມາໃນທັນທີ

ທ່ານ ຄາລອສ ທາບົວດາ ໜຶ່ງໃນທີມງານວິທະຍາສາດເວົ້າວ່າ ກໍລະນີທີ່ພົບນີ້ ຖືເປັນຄັ້ງທຳອິດໃນວົງການວິທະຍາສາດ ທີ່ພົບກົບເຮືອງແສງຕາມທຳມະຊາດ, ສ່ວນ ທ່ານ ຈູລຽນ ເຟໂວວິຊ ນັກວິທະຍາສາດອີກຄົນເວົ້າວ່າ ຮູ້ສຶກຕື່ນເຕັ້ນຫຼາຍ ກັບການຄົ້ນພົບຄັ້ງນີ້ ເຮັດໃຫ້ຄວາມຮັບຮູ້ເຂົ້າໃຈກ່ຽວກັບການເຮືອງແສງໃນສະພາບແວດລ້ອມຂອງໂລກ ທີ່ເຮົາມີຢູ່ປ່ຽນໄປຫຼາຍ ເຮັດໃຫ້ເກີດການຍອມຮັບວ່າ ສານປະກອບໃໝ່ຂອງການເຮືອງແສງ ທີ່ພົບອາດມີຄວາມສຳພັນທາງຫຼັກວິທະຍາສາດ ຫຼືເຕັກໂນໂລຊີ ແລະຍັງເຮັດໃຫ້ເກີດຄຳຖາມໃໝ່ ກ່ຽວກັບການສື່ສານໃນການເບິ່ງເຫັນຂອງສັດເຄິ່ງບົກເຄິ່ງນໍ້າອີກດ້ວຍ

ທັງນີ້ ທີມນັກວິທະຍາສາດໄດ້ເຮັດການສຶກສາ ຈາກກຸ່ມຕົວຢ່າງຫຼາຍກວ່າ 200 ກຸ່ມ ເພື່ອຄວາມໝັ້ນໃຈວ່າປະກົດການທີ່ພົບບໍ່ໄດ້ ເປັນຜົນຈາກການຖືກຂັງຂອງກົບ ແລະຍັງພົບຄຸນລັກສະນະການເຮືອງແສງນີ້ໃນກົບທຸກສາຍພັນ