ບີບີຊີລາຍງານເມື່ອວັນທີ 16 ມີນາ 2017 ຜ່ານມາວ່າ ບາດຫຼວງເອັມມານູເອລ ໂມໂມ ໄດ້ຄົ້ນພົບເພັດນໍ້າໜັກ 709 ກະຣັດໃນໝູ່ບ້ານເຂດໂຄໂນ ພາກຕາເວັນອອກຂອງເຊຍຣາ ລີໂອນ ແຫຼ່ງເພັດຂະໜາດໃຫຍ່ຂອງປະເທດ ເຊິ່ງເຊື່ອວ່າເປັນໜຶ່ງໃນເພັດເມັດໃຫຍ່ທີ່ສຸດໃນໂລກ

ປະຈຸບັນເພັດເມັດດັ່ງກ່າວ ເກັບໄວ້ໃນທະນາຄານກາງຂອງເຊຍຣາ ລີໂອນ ແລະເຊື່ອວ່າເປັນໜຶ່ງໃນເພັດ 20 ເມັດ ທີ່ມີຂະໜາດໃຫຍ່ທີ່ສຸດໃນໂລກ ແຕ່ກໍຍັງມີການປະເມີນລາຄາຢູ່ ເພາະມີຮອຍຕຳໜິທາງດ້ານໃນ

ນອກຈາກຄົ້ນພົບເພັດດັ່ງກ່າວແລ້ວ ຍັງມີການພົບເພັດຂະໜາດໃຫຍ່ລ່າສຸດໃນປະເທດນີ້ໃນປີ 1972 ເຊິ່ງພົບເພັດທີ່ມີຊື່ວ່າ ດວງດາວແຫ່ງເຊຍຣາ ລີໂອນ ເຊິ່ງມີນໍ້າໜັກເຖິງ 969 ກະຣັດ

ປະເທດເຊຍຣາ ລີໂອນຂຶ້ນຊື່ວ່າ ເປັນປະເທດທີ່ມີຊັບພະຍາກອນເພັດ ແລະລາຍໄດ້ສ່ວນໜຶ່ງຂອງປະເທດມາຈາກອຸດສະຫະກຳການເຮັດເພັດ, ແຕ່ຊ່ວງສົງຄາມການເມືອງ ກຸ່ມຕໍ່ຕ້ານລັດຖະບານກໍໃຊ້ເພັດເປັນສິ່ງຂອງແລກປ່ຽນອາວຸດ ເພື່ອໃຊ້ໃນສົງຄາມອີກດ້ວຍ