ໃນວັນທີ 15 ມີນາ 2017 ຜ່່ານມາ ທ່ານ ຈັນທະຈອນ ແກ້ວລະຄອນ ຫົວໜ້າຄະນະປະສານງານ ໂຄງການກໍ່ສ້າງທາງລົດໄຟລາວ-ຈີນປະຈໍາແຂວງຫລວງນໍ້າທາ ໄດ້ໃຫ້ສໍາພາດວ່າ: ໃນທ້າຍປີ 2016 ຜ່ານມາໄດ້ມີການວາງສີລາເລີກໃນໂຄງການກໍ່ສ້າງເສັ້ນທາງລົດໄຟ ລາວ-ຈີນ ຢູ່ແຂວງຫລວງພະບາງ ເຫັນວ່າ ປັດຈຸບັນນີ້ໂຄງການກໍ່ສ້າງທາງລົດໄຟ ລາວ-ຈີນ ໄລຍະທີ 1 ມີຄວາມຄືບໜ້າໄວເກີນຄາດ ໂດຍນັກວິຊາການ ແລະ ກໍາມະກອນສອງຝ່າຍປະມານ 300 ກວ່າຄົນ ໄດ້ລົງມືເຈາະອຸບມົງ ເສັ້ນທາງລົດໄຟລອດຢ່າງເຄັ່ງຮ້ອນ ເຊິ່ງໂຄງການໄລຍະທີ 1 ນີ້ແມ່ນເລີ່ມຈາກເຂດບໍ່ເຕັນ ແຂວງຫລວງນໍ້າທາ ຫາເມືອງນາໝໍ້ ແຂວງອຸດົມໄຊ ເຊິ່ງມີຄວາມຍາວ 50 ກວ່າກິໂລແມັດ ໃນນັ້ນຜ່ານແຂວງຫລວງນໍ້າທາ 16 ກວ່າກິໂລແມັດ, ມີ 2 ສະຖານີຄື: ສະຖານີບໍ່ເຕັນເປັນສະຖານີນ້ອຍ ສໍາລັບກວດເຂົ້າ-ອອກເມືອງ ແລະ ສະຖານີນາເຕີຍ ເປັນສະຖານີໃຫຍ່ສໍາລັບຄ່ຽນຖ່າຍສີນຄ້າ, ມີຂົວ 7 ແຫ່ງຍາວ 4.000 ແມັດ, ອຸບມົງ 3 ແຫ່ງຍາວ 10.000 ແມັດ (ອຸບມົງມິດຕະພາບລາວ-ຈີນ ຍາວ 2.000 ແມັດ, ອຸບມົງບໍ່ເຕັນຍາວ 6.000 ແມັດ, ອຸບມົງຕີນຕົກ 1.000 ແມັດ).
ການຈັດຕັ້ງປະຕິບັດໂຄງການ ກໍ່ສ້າງເສັ້ນທາງລົດໄຟ ລາວ-ຈີນ ນັ້ນແມ່ນດໍາເນີນຄວບຄູ່ກັນໄປກັບຫລາຍວຽກ ປິ່ນອອ້ມ ເຊິ່ງປະຈຸບັນນີ້ ການກໍ່ສ້າງເຮືອນພັກພະນັກງານ-ກໍາມະກອນສໍາເລັດ 60%, ວຽກເກັບກູ້ລະເບີດສໍາເລັດ 12 ກວ່າກິໂລແມັດ, ການໄກ່ເກ່ຍແກ້ໄຂຜົນກະທົບ ແລະ ສິ່ງກີດຂວາງ ອອກຈາກແລວທາງລົດໄຟແມ່ນ ມີຄວາມກ້າວໜ້າພໍສົມຄວນ.
ສ່ວນປະຊາຊົນ ຜູ້ທີ່ໄດ້ຮັບຜົນກະທົບກໍໄດ້ສະເໜີ 4 ບັນຫາຄື: 1. ຂໍໃຫ້ຊົດເຊີຍຕາມຄວາມເໝາະສົມ, ສາມາດໄປສ້າງທີ່ຢູ່ອາໃສໃໝ່ ໃຫ້ດີກວ່າເກົ່າ ຫລື ເທົ່າເດີມ; 2. ສະເໜີຈັດສັນທີ່ຢູ່ອາໃສບ່ອນໃໝ່ເປັນທີ່ຮຽບຮ້ອຍ ແລ້ວຈິ່ງຄ່ອຍໃຫ້ດໍາເນີນການກໍ່ສ້າງ, 3. ສະເໜີພາກລັດໃຫ້ກໍານົດລາຄາ ຫົວໜ່ວຍຊົດເຊີຍໂດຍໄວ ເພື່ອສະດວກໄກ່ເກ່ຍ ແລະ 4. ຂະເໜີຄ່າຊົດເຊີຍການຍົກຍ້າຍບ້ານ ນອກຈາກເປັນເງິນສົດແລ້ວ ຍັງຮູບແບບນະໂຍບາຍອື່ນໆອີກບໍ ເປັນຕົ້ນ ຈັດສັນ ແລະ ປຸກເຮືອນໃຫ້ຄືກັບໂຄງການເຂື່ອນໄຟຟ້ານໍ້າທາ 1.
ເສັ້ນທາງລົດໄຟ ລາວ-ຈີນ ມີຄວາມຍາວທັງໝົດ 417 ກິໂລແມັດ, ມູນຄ່າການກໍ່ສ້າງປະມານ 6,8 ຕື້ໂດລາ ແລະ ຄາດວ່າຈະສໍາເລັດພາຍໃນປີ 2020.
ແຫຼ່ງຂ່າວ: ສຳນັກຂ່າວສານປະເທດລາວ