ຕອນເຊົ້າວັນທີ 14 ມີນາ 2016 ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະ ແລະ ການນຳແຂວງວຽງຈັນ ໄດ້ເຄື່ອນໄຫວຢ້ຽມຢາມ ແລະ ໂອ້ລົມ ຕໍ່ພະນັກງານ ຫຼັກແຫຼ່ງ ເມືອງໝື່ນ, ແຂວງວຽງຈັນ ຢູ່ທີ່ສະໂມສອນຂອງເມືອງໝື່ນ.

ໃນໂອກາດດຽວກັນ ທ່ານນາຍົກ ກໍໄດ້ຮັບຟັງການລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ທີ່ພົ້ນເດັ່ນຂອງເມືອງໃນໄລຍະ 1 ປີຜ່ານມາ ຈາກທ່ານພູວອນ ບຸນວິໄລ ເຈົ້າເມືອງໆໝື່ນວ່າ ທົ່ວເມືອງສືບຕໍ່ມີຄວາມສະຫງົບ ແລະເປັນລະບຽບຮຽບຮ້ອຍໂດຍພື້ນຖານ; ເສດຖະກິດຂະຫຍາຍຕົວໃນລະດັບ 10,74 ສ່ວນຮ້ອຍ, ລາຍຮັບສະເລ່ຍໃສ່ຫົວຄົນ ບັນລຸ 1.567 ໂດລາ/ຄົນ/ປີ, ສະເລ່ຍເຂົ້າກິນຕໍ່ຫົວຄົນ ໄດ້ 535 ກິໂລກະລາມ/ປີ (ສາມາດກຸ້ມກິນ ແລະ ມີສ່ວນແຮໄວ້ເພື່ອຂາຍເປັນສິນຄ້າ), ຄອບຄົວທຸກຍາກ ຍັງກວມ 2 ສ່ວນຮ້ອຍ.

ໃນນັ້ນ ທ່ານນາຍົກກໍໄດ້ເນັ້ນໜັກ ໃຫ້ຄະນະນຳ, ບັນດາຂະແໜງການຂອງເມືອງໝື່ນ ແລະ ພາກສ່ວນທີ່ກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນແມ່ນ ສືບຕໍ່ເສີມຂະຫຍາຍຜົນສຳເລັດ, ມູນເຊື້ອອັນດີງາມທີ່ການນຳຮຸ່ນກ່ອນ ສາມາດ ຈັດຕັ້ງປະຕິບັດໄດ້; ອຳນວຍຄວາມສະດວກຮອບດ້ານໃຫ້ແກ່ປະຊາຊົນ ບົນພື້ນຖານ ຖືກຕ້ອງຕາມລະບຽບກົດໝາຍ ແລະ ແທດເໝາະກັບເງື່ອນໄຂຄວາມເປັນຈິງ; ເອົາໃຈໃສ່ຕ້ານ ແລະສະກັດກັ້ນ ປະກົດການຫຍໍ້ທໍ້ຕ່າງໆໃນສັງຄົມເປັນຕົ້ນ ການຄ້າຂາຍເຖື່ອນ (ຢາເສບຕິດ, ສິນຄ້າຜິດກົດໝາຍ, ການເຄື່ອນໄຫວບໍ່ຖືກລະບຽບກົດໝາຍ), ບັນຫາແຮງງານ…; ພ້ອມກັນເອົາໃຈໃສ່ປະຕິບັດ ມາດຕະການປະຢັດມັດທະຍັດໃຫ້ມີປະສິດທິຜົນແທ້ໆ ເພື່ອຄວາມຮັ່ງມີ ແລະ ເຂັ້ມແຂງໃນອະນາຄົດ; ຄົ້ນຄວ້າ ແລະ ກຳນົດໃຫ້ເຫັນເງື່ອນໄຂທ່າແຮງ ທີ່ເປັນປາຍແຫຼມຂອງເມືອງ ຢ່າງຖືກຕ້ອງ, ທັງນຳໃຊ້ໃຫ້ມີປະສິດທິຜົນສູງສຸດ ຕິດພັນກັບການປົກປັກຮັກສາ ຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ມີຄວາມຍືນຍົງ; ຕີລາຄາຄືນ ການຈັດຕັ້ງປະຕິບັດວຽກງານຂອງຕົນ ມີຜົນສຳເລັດ, ພ້ອມດຽວກັນນັ້ນ ທ່ານຍັງໄດ້ຮຽກຮ້ອງໃຫ້ພະນັກງານ-ລັດຖະກອນທຸຄົນ ເສຍສະຫຼະຜົນປະໂຫຍດສ່ວນຕົວ ເພື່ອຜົນປະໂຫຍດສ່ວນລວມ ໃຫ້ຫຼາຍ, ພູມໃຈໃນຄວາມເປັນລາວ, ມີນ້ຳໃຈຮັກຊາດ, ຮັກບ້ານເກີດເມືອງນອນ ແລະ ບໍລິການຮັບໃຊ້ປະຊາຊົນຢ່າງສຸດໃຈ, ສາມາດເປັນພາບພົດ ແລະ ແບບຢ່າງອັນດີໃຫ້ແກ່ສັງຄົມ.

ໃນມື້ດຽວກັນນັ້ນ, ທ່ານນາຍົກລັດຖະມົນຕີ ຍັງໄດ້ໄປຢ້ຽມຢາມ ແລະ ໂອ້ລົມ ຕໍ່ພະນັກງານຄູ-ອາຈານ ແລະ  ນັກຮຽນ ໂຮງຮຽນມັດທະຍົມສົມບູນນ້ຳຮອນ ຕື່ມອີກ.

ແຫຼ່ງຂ່າວ: ຫ້ອງວ່າການສຳນັກງານນາຍົກລັດຖະມົນຕີ