ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ໄດ້ຕ້ອນຮັບການເຂົ້າຢ້ຽມຂໍ່ານັບທ່ານ ຫງວຽນເຖ້ຫຸງ ຮອງປະທານຄະນະກຳມະການປະຊາຊົນ ນະຄອນຫຼວງຮ່າໂນ້ຍ ສສ ຫວຽດນາມ ພ້ອມຄະນະ ໃນໂອກາດເດີນທາງມາເຂົ້າຮ່ວມກອງປະຊຸມຄົມມະນາຄົມ ທີ່ຍືນຍົງຕໍ່ສິ່ງແວດລ້ອມ ອາຊີ ຄັ້ງທີ 10 ທີ່ນະຄອນຫຼວງວຽງຈັນ ແຕ່ວັນທີ 13-17 ມີນານີ້.
ໃນໂອກາດດຽວກັນນີ້ ທ່ານເຈົ້າຄອງ ນວ ໄດ້ຕ້ອນຮັບ ແລະຕີລາຄາສູງຕໍ່ການເດີນທາງມາເຮັດວຽກຢູ່ ນວ ເຊິ່ງຖືເປັນການປະກອບສ່ວນພິເສດ ແລະການຮ່ວມມືຮອບດ້ານລະຫວ່າງສອງພັກ-ລັດທີ່ມີມາແຕ່ດົນນານ ໃຫ້ນັບມື້ອອກດອກຍິ່ງຂຶ້ນເລື້ອຍໆ, ສຳລັບປີນີ້ແມ່ນ ສຳລັບປີນີ້ແມ່ນປີສຳຄັນອີກປີໜຶ່ງ ທີ່ສອງປະເທດຈະໄດ້ພ້ອມກັນສະເຫຼີມສະຫຼອງ 2 ວັນປະຫວັດສາດ ຄື: 55 ປີວັນສ້າງຕັ້ງສາຍພົວພັນການທູດ ລາວ-ຫວຽດນາມ ແລະ 40 ປີວັນເຊັນສົນທິສັນຍາມິດຕະພາບ ແລະ ການຮ່ວມມືສອງປະເທດ, ພ້ອມນີ້ ທ່ານເຈົ້າຄອງຍັງໄດ້ສະແດງຄວາມຂອບໃຈ ມາຍັງນະຄອນຫຼວງຮ່າໂນ້ຍ ທີ່ໄດ້ໃຫ້ການຊ່ວຍເຫຼືອສ້າງໂຮງຮຽນທິດສະດີການເມືອງ ແລະ ການປົກຄອງ ນວ.
ທ່ານ ຫງວຽນ ເຖ້ຫຸງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຝາກຄຳອວຍພອນຢ້ຽມຢາມຖາມຂ່າວຂອງການນຳນະຄອນຫຼວງຮ່າໂນ້ຍ ມາຍັງທ່ານເຈົ້າຄອງ ນວ ທີ່ກຳລັງຈັດຕັ້ງປະຕິບັດບັນດາກິດຈຳການເຄື່ອນໄຫວສະເຫຼີມສະຫຼອງ 2 ວັນປະຫວັດສາດທີ່ສຳຄັນ ແລະ ເຫັນວ່າສາຍພົວພັນລະຫວ່າງສອງປະເທດ ກໍ່ຄືສອງນະຄອນຫຼວງນັບມື້ແໜ້ນແຟ້ນຍິ່ງຂຶ້ນ ແລະ ໄດ້ມີການຮ່ວມມືກັນຫຼາຍດ້ານ ເປັນຕົ້ນ ຂົງເຂດກະສິກຳ ແຮງງານ ແລະ ສຶກສາທິການ ທີ່ກຳລັງໄດ້ຮັບການພັດທະນາ.
ແຫຼ່ງຂ່າວ: ໜັງສືພິມ ວຽງຈັນໃໝ່