ຕອນບ່າຍວັນທີ 13 ມີນາ 2017 ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ແລະການນຳແຂວງວຽງຈັນ ໄດ້ເຄື່ອນໄຫວຢ້ຽມຢາມ ແລະໂອ້ລົມ ຕໍ່ພະນັກງານ-ລັດຖະກອນ, ທະຫານ, ຕໍາຫຼວດ ແລະຄອບຄົວຕົວແບບ ເມືອງຊະນະຄາມ, ແຂວງວຽງຈັນ.
ທ່ານນາຍົກ ໄດ້ຮັບຟັງລາຍງານຈາກທ່ານ ສະໝານ ວິເສດຍະພົງ ເຈົ້າເມືອງຊະນະຄາມວ່າທົ່ວເມືອງສືບຕໍ່ມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບ ແລະມີຄວາມເປັນລະບຽບຮຽບຮ້ອຍດີ; ເສດຖະກິດຂະຫຍາຍຕົວບໍ່ຫຼຸດ 8%ສ່ວນຮ້ອຍ, ລາຍຮັບສະເລ່ຍໃສ່ຫົວຄົນ ບັນລຸ 1.775 ໂດລາ/ຄົນ/ປີ, ສະເລ່ຍເຂົ້າເປືອກໃສ່ຫົວຄົນ ໄດ້ 1.058 ກິໂລກະລາມ/ຄົນ/ ປີ, ປີ 2016 ສາມາດເກັບລາຍຮັບ ເຂົ້າງົບປະມານໄດ້ 4,74 ຕື້ກີບ ເທົ່າກັບ 110,45 ສ່ວນຮ້ອຍ, ທົ່ວເມືອງ ໄດ້ນຳໃຊ້ໄຟຟ້າແລ້ວ 100 ສ່ວນຮ້ອຍ, ມີຄອບຄົວພັດທະນາກວມ 99% ສ່ວນຮ້ອຍ, ບ້ານພັດທະນາ ກວມ 70,5% ສ່ວນຮ້ອຍ, ບ້ານວັດທະນະທຳ ກວມ 94% ສ່ວນຮ້ອຍ, ບ້ານສາທາລະນະສຸກ ກວມ 100% ສ່ວນຮ້ອຍ, ບ້ານປອດຄະດີ ກວມ 97% ສ່ວນຮ້ອຍ, ອັນພົ້ນເດັ່ນ ແມ່ນມີສິນຄ້າ ໜຶ່ງເມືອງໜຶ່ງຜະລິດຕະພັນ (ODOP) ຈໍານວນຫຼວງຫຼາຍ.
ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ໃຫ້ກຽດໂອ້ລົມ ຕໍ່ຜູ້ເຂົ້າຮ່ວມ ໃນນັ້ນ ທ່ານໄດ້ຍົກໃຫ້ເຫັນສະພາບການພັດທະນາເສດຖະກິດ-ສັງຄົມແຫ່ງຊາດ ທີ່ພົ້ນເດັ່ນ, ຊົມເຊີຍຕໍ່ຜົນສຳເລັດ ທີ່ອຳນາດການປົກຄອງ ແລະ ປະຊາຊົນບັນດາເຜົ່າ ຊາວເມືອງຊະນະຄາມ ສາມາດຍາດມາໄດ້ໃນໄລຍະທີ່ຜ່ານມາ ແລະ ທີ່ສຳຄັນ, ທ່ານໄດ້ມີຄຳເຫັນ ເນັ້ນໜັກໃຫ້ການນຳຂອງເມືອງ ກໍ່ຄືຜູ້ເຂົ້າຮ່ວມ ແລະ ພາກສ່ວນທີ່ກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນ ສ້າງເງື່ອນໄຂ ແລະ ອຳນວຍຄວາມສະດວກ ໃຫ້ແກ່ການດຳລົງຊີວິດ ກໍ່ຄື ການຜະລິດ, ການຄ້າຂາຍຂອງປະຊາຊົນ ບົນພື້ນຖານ ຕາມລະບຽບກົດໝາຍ, ບໍ່ເອົາປຽບ ແລະ ມີນ້ຳໃຈບໍລິການ ຮັບໃຊ້ປະຊາຊົນຢ່າງແທ້ຈິງ; ເດັດຂາດ ແລະ ເຂັ້ມງວດ ຕໍ່ການຈັດຕັ້ງປະຕິບັດ ບັນດານິຕິກຳ ທີ່ລັດຖະບານວາງອອກ ແລະ ພວມເປັນ ບັນຫາພົ້ນເດັ່ນ ເປັນຕົ້ນ ບັນຫາໄມ້, ບັນຫາແຮງງານ, ບັນຫາຢາເສບຕິດ…; ສົ່ງເສີມການປູກພືດປອດສານພິດ ໂດຍໝູນໃຊ້ທ່າແຮງທາງທຳມະຊາດ ເຂົ້າໃນການຜະລິດ (ບໍ່ໃຫ້ນຳໃຊ້ສານເຄມີ) ທັງນີ້ ກໍ່ເພື່ອເຮັດໃຫ້ສິ່ງແວດລ້ອມສະອາດ, ມີສຸຂະ ພາບແຂງແຮງ ແລະ ກາຍເປັນຕົ້ນທຶນທີ່ຍືນຍາວ; ໃຫ້ທຸກຄົນເປັນເຈົ້າການ ຊ່ວຍເຈົ້າໜ້າທີ່ຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນຂອບ ເຂດເມືອງຂອງຕົນ ໃຫ້ນັບມື້ໝົດໄປເປັນກ້າວໆ.
ແຫຼ່ງຂ່າວ: ຫ້ອງວ່າການສຳນັກງານນາຍົກລັດຖະມົນຕີ