ທ່ານນາງ ເຮເລນ ຄຼາກ ຜູ້ອຳນວຍການໃຫຍ່ຂອງອົງການສະຫະປະຊາຊາດ ເພືອການພັດທະນາ, ພ້ອມດ້ວຍຄະນະໄດ້ເດີນທາງມາຢ້ຽມຢາມ ສປປ ລາວ ໃນວັນທີ 12-13 ມີນາ 2017 ແລະໃນວັນທີ 13 ມີນາ 2017 ເວລາ 09:00 ໂມງ ທ່ານພ້ອມຄະນະ ໄດ້ເຂົ້າຢ້ຽມຂໍ່ານັບ ທ່ານທອງລຸນ ສີສຸລິດ ນາຍົກລັດຖະມົນຕີ ແຫ່ງສປປ ລາວ ແລະໃນຕອນບ່າຍຂອງວັນດຽວກັນ ກໍໄດ້ເຂົ້າພົບປະທ່ານ ນາງ ປານີຢ່າທໍ່ຕູ້ ປະທານສະພາແຫ່ງຊາດ
ໃນການເຂົ້າຢ້ຽມຂໍ່ານັບ ຂອງທ່ານນາງ ເຮເລນ ຄຼາກ ກັບການນຳຂັ້ນສູງຂອງສປປ ລາວຄັ້ງນີ້ ໄດ້ປຶກສາຫາລືກ່ຽວກັບການຮ່ວມມືລະຫວ່າງສປປ ລາວ ແລະອົງການສະຫະະຊາຊາດເວົ້າລວມ, ເວົ້າສະເພາະແມ່ນ ສປປ ລາວ ແລະອົງການ ສປຊ ເພື່ອການພັດທະນາ ໂດຍສະເພາະການສະໜັບສະໜູນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ເປົ້າໝາຍະຫັດສະວັດ ເພື່ອການພັດທະນາ ຈົນມາເຖິງເປົ້າໝາຍການພັດທະນາແບບຍືນຍົງ ໂດຍຜ່ານການຈັດຕັ້ງປະຕິບັດແຜນງານໂຄງການ ແລະກິດຈະກຳຕ່າງໆຕະຫຼອດໄລຍະຜ່ານມາ
ການນຳຂັ້ນສູງຂອງ ສປປ ລາວ ໄດ້ສະແດງຄວາມຂອບໃຈຕໍ່ອົງການ ສປຊ ເພື່ອການພັດທະນາ ທີ່ໄດ້ສະໜັບສະໜູນ ແລະຊ່ວຍເຫຼືອ ສປປ ລາວ ຜ່ານບັນດາແຜນງານ ແລະໂຄງການຕ່າງໆໂດຍມີມູນຄ່າປະມານ 100 ລ້ານໂດລາສະຫະລັດ, ສຳລັບແຜນງານສົກປີ 2011-2016 ແລະສຳລັບສົກປີ 2017-2021 ງົບປະມານ ທີ່ຄາດຄະເນໄວ້ປະມານ 103 ລ້ານໂດລາສະຫະລັດ ທີ່ເປັນສ່ວນສຳຄັນໃນການປະກອບສ່ວນສຳຄັນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ລວມທັງການແກ້ໄຂຄວາມຫຍຸ້ງຍາກ, ຂະບວນການກອງປະຊຸມໂຕະມົນ, ວຽກງານເກັບກ້ລະເບີດ, ການປັບປຸງບູລະນະການປົກຄອງ ແລະອື່ນໆ
ໃນໂອກາດດຽວກັນທ່ານນາງ ເຮເລນ ຄຼາກ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ແລະຄວາມຄືບໜ້າໃນຫຼາຍດ້ານຂອງລັດຖະບານລາວ ໃນການພັດທະນາປະເທດ.
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ