ໃນວັນທີ 13 ມີນາ 2017 ຜ່ານມາ ທີ່ກະຊວງປ້ອງກັນປະເທດ ໄດ້ມີການພົບປະລະຫວ່າງ ລາວ-ລັດເຊຍ ຝ່າຍລາວນຳໂດຍທ່ານ ພົ.ຕ ສຸວອນ ເລືອງບຸນມີ ຮອງລັດຖະມົນຕີ ກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການ ພ້ອມດ້ວຍຄະນະ ແລະ ສ່ວນຝ່າຍລັດເຊຍ ນຳໂດຍທ່ານ ພົນໂທ ຊາລູກົບ ອາເລກ ລິໂອນີໂດວິຈ ຜູ້ບັນຊາການທະຫານບົກ ກະຊວງປ້ອງກັນປະເທດ ແຫ່ງ ສ ລັດເຊຍ ພ້ອມດ້ວຍຄະນະ.
ໃນລະຫວ່າງທີ່ທັງສອງຝ່າຍພົບປະກັນນັ້ນ ກໍໄດ້ມີການປຶກສາຫາລືເປັນເອກະພາບ ແລະໄດ້ລາຍງານໃຫ້ຄະນະນຳກະຊວງ ແຕ່ລະຝ່າຍຮັບຊາບ ເຖິງທິດທາງການຮ່ວມມືໃນຕໍ່ໜ້າຄື: ສືບຕໍ່ແລກປ່ຽນຄະນະຜູ້ແທນການທະຫານຂັ້ນສູງ ແລະຂັ້ນຕ່າງໆ ທີ່ເຫັນວ່າມີຄວາມຈຳເປັນ ເພື່ອແນ່ໃສ່ຈັດຕັ້ງປະຕິບັດຜັນຂະຫຍາຍ ເນື້ອໃນການພົວພັນຮ່ວມມື ລະຫວ່າງ ສອງກອງທັບ ລາວ-ລັດເຊຍ ໃຫ້ເກີດດອກອອກຜົນຍິ່ງໆຂຶ້ນ; ພ້ອມດຽວກັນ ຝ່າຍລັດເຊຍ ຈະສືບຕໍ່ຊ່ວຍກໍ່ສ້າງ ພະນັກງານກອງທັບປະຊາຊົນລາວ ໃນໄລຍະສັ້ນ ແລະໄລຍະຍາວ ໃນຂະແໜງການຕ່າງໆ ທີ່ເຫັນວ່າຝ່າຍລາວ ຍັງມີຄວາມຕ້ອງການ.
ໃນໂອກາດດຽວກັນນັ້ນ, ທ່ານ ພົ.ຕ ສຸວອນ ເລືອງບຸນມີ ໄດ້ກ່າວວ່າ: ໃນການຢ້ຽມຢາມໃນຄັ້ງນີ້ຂອງ ທ່ານ ພົນໂທ ຊາລູກົບ ອາເລກ ລິໂອນີໂດວິຈ ພ້ອມດ້ວຍຄະນະ ເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍ ສ້າງສາຍພົວພັນຮ່ວມມື ທີ່ມີມູນເຊື້ອຂອງສອງຊາດ, ສອງກອງທັບ ໃຫ້ນັບມື້ນັບແໜ້ນແຟ້ນ ແລະຈະເລີນງອກງານຍິ່ງໆຂຶ້ນໄປ.
ແຫຼ່ງຂ່າວ: ສຳນັກຂ່າວສານປະເທດລາວ