ໃນ​ວັນ​ທີ 10 ມີນາ 2017ຜ່ານມາ ທີ່​ສູນ​ໄຂ້ຍຸງ​ແມ່​ກາ​ຝາກ ແລະ ແມງໄມ້ ໄດ້​ຈັດ​ພິທີ​ມອບ-ຮັບ​ມຸ້ງເຄືອບ​ຢາ​ຍາວ​ນານ ​ຈາກ​ອົງການພັດທະນາ​ອາ​ເມ​ຣິ​ກາ ​ໃຫ້​ແກ່​ກະຊວງ​ສາທາລະນະ​ສຸກ, ເຊິ່ງຕາງໜ້າມອບ​ໂດຍ​ທ່ານ ໄມ​ໂຄ​ຄລາຍ ອຸປະ​ທູດ​ສະຫະລັດ​ອາ​ເມ​ຣິ​ກາປະຈຳ​ລາວ ແລະ ຕາງໜ້າ​ຮັບໂດຍ​ທ່ານ ພູທອນ ເມືອງ​ປາກ ຮອງ​ລັດຖະມົນຕີ​ກະຊວງ​ສາ​ທາລະນະ​ສຸກ ແລະມີ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ໃນ​ການ​ຊ່ວຍເຫຼືອ​ຄັ້ງ​ນີ້​ ອົງການ​ພັດທະນາ​ອາ​ເມ​ຣິ​ກາ ​ໄດ້ນຳ​ມຸ້ງຈຳນວນ 120.000 ດາງ ມາ​ມອບ​ໃຫ້​ແກ່​ກະຊວງ​ສາ​ທາລະນະ​ສຸກ ເພື່ອ​ໄປ​ມອບ​ຕໍ່ໃຫ້ 7 ແຂວງ​ຄື: ແຂວງ​ຜົ້ງ​ສາລີ, ອຸດົມໄຊ,ໄຊ​ຍະ​ບູ​ລີ, ຄໍາ​ມ່ວນ, ສະຫວັນນະ​ເຂດ, ສາລະ​ວັນ ແລະ ແຂວງບໍ​ລິ​ຄຳໄຊ ເຊິ່ງ​ອົງການ​ນີ້​ ໄດ້​ໃຫ້ການຊ່ວຍເຫຼືອ​ມາ​ຕັ້ງແຕ່​ປີ 2011 ຈົນຮອດ​ປີ 2017 ລວມ​ທັງ​ໝົດ 472.100 ດາງ ສາມາດ​ປ້ອງ​ກັນໃຫ້​ປະຊາຊົນ​ໄດ້ 849.780 ຄົນ.

ນອກຈາກ​ນັ້ນ ອົງການ​ດັ່ງກ່າວ ຍັງ​ໄດ້​ຊ່ວຍເຫຼືອ​ການ​ຕອບ​ໂຕ້ການ​ລະບາດ​ ການ​ກໍ່ສ້າງ​ບຸ​ຄະລາ​ກອນ​ການ​ເຝົ້າ​ລະວັງ ແລະ ການຕິດຕາມ​ເຊື້ອ​ຕ້ານ​ຕໍ່​ຢາ​ ໂດຍ​ຜ່ານ​ອົງການ​ອະນາໄມ​ໂລກ ແລະ ໄດ້ຊ່ວຍ​ຢາ​ປິ່ນປົວ​ໄຂ້ຍຸງ​ລາຍ ແລະ ເຄື່ອງ​ບົ່ງມະຕິ​ພະຍາດ.

ແຫຼ່ງຂ່າວ: ໜັງສືພິມ ວຽງຈັນໃໝ່