ເອພີ ລາຍງານເມື່ອວັນທີ 12 ມີນາ 2017 ຜ່ານມາວ່າ ເກີດເຫດດິນຖະຫຼົ່ມຢູ່ບໍລິເວນຖິ້ມຂີ້ເຫຍື້ອ ໃນພື້ນທີ່ນະຄອນແອດດິສ ອະບາບາ ເມືອງຫຼວງຂອງປະເທດເອທິໂອເປຍ ເຮັດໃຫ້ມີຜູ້ເສຍຊີວິດຈຳນວນຫຼາຍ ພົບສົບແລ້ວ 48 ຄົນ ແລະຄາດວ່າຍັງມີຜູ້ຕິດຢູ່ໃຕ້ກອງຂີ້ເຫຍື້ອອີກຫຼາຍສິບຄົນ ເພາະຍັງມີຜູ້ສູນຫາຍເປັນຈຳນວນຫຼາຍ.
ສະຖານທີ່ເກີດເຫດນັ້ນ ເປັນບ່ອນຖິ້ມຂີ້ເຫຍື້ອມາດົນກວ່າ 50 ປີ, ເຊິ່ງຢູ່ດີໆດິນກໍຖະຫຼົ່ມລົງມາ ໃນຕອນກາງຄືນຂອງວັນເສົາ ວັນທີ 11 ມີນາ 2017 ເຊິ່ງມີຄົນຢູ່ໃນບໍລິເວນນັ້ນ 150 ຄົນ, ເຮັດໃຫ້ກອງຂີເຫຍື້ອທີ່ໃຫຍ່ມະຫຶມານັ້ນທັບເຮືອນ ແລະບ່ອນຢູ່ອາໄສຂອງຄົນທຸກຍາກໃນພື້ນທີ່ດັ່ງກ່າວ, ເຮັດໃຫ້ກູ້ໄພເຂົ້າຊ່ວຍເຫຼືອຊາວບ້ານ ທີ່ປອດໄພໄດ້ປະມານ 37 ຄົນ
ທາງເຈົ້າໜ້າທີ່ເຊື່ອວ່າ ຈຳນວນຜູ້ເສຍຊີວິດ ຈະເພີ່ມຂຶ້ນຫຼາຍກວ່ານີ້ ແລະຈະມີເດັກນ້ອຍຈຳນວນຫຼາຍ ໃນກຸ່ມຜູ້ເສຍຊີວິດ, ເຊິ່ງທາງເຈົ້າໜ້າທີ່ ໄດ້ຄົ້ນຫາຜູ້ສູນຫາຍຢ່າງຕໍ່ເນື່ອງ.