ໃນວັນທີ 8 ມີນາ 2017 ຜ່ານມາ ໄດ້ມີພິທີຫຼໍ່ຄຳນໍ້າໜັກຫຼາຍກວ່າ 5 ກິໂລກຣາມ ເພື່ອໂອບໃສ່ຈອມພະທາດເຈດີ ທີ່ວັດອົງຕື້ ເມືອງຊຳເໜືອ ແຂວງຫົວພັນ ໂດຍແມ່ນອົງການປົກຄອງແຂວງຫົວພັນ ຮ່ວມກັບບໍລິສັດ ພອນປະເສີດ ສຳຫຼວດ ອອກແບບ ທີ່ປຶກສາ ແລະ ກໍ່ສ້າງ ຈຳກັດ, ເຊິ່ງໄດ້ຈັດພິທີຂຶ້ນທີ່ບໍລິສັດ ຜະລິດຕະພັນວັດທະນະທຳ ບ້ານໂພນຕ້ອງຈອມມະນີ ເມືອງໄຊເຊດຖາ ນະຄອນຫຼວງວຽງຈັນ, ມີພະເຖລານຸເຖລະ, ທ່ານ ພັນຄຳ ວິພາວັນ ຮອງປະທານປະເທດ ພ້ອມດ້ວຍທ່ານເຈົ້າແຂວງຫົວພັນ ບັນດາພັນລະຍາການນຳ, ນັກທຸລະກິດ ແລະເຈົ້າພາບເຈົ້າສັດທາເຂົ້າຮ່ວມ.
ໃນພິທີດັ່ງກ່າວ ທ່ານ ວັນໄຊ ແພງຊຸມມາ ເຈົ້າແຂວງຫົວພັນ ໄດ້ຕາງໜ້າໃຫ້ການນຳແຂວງຫົວພັນ ຂຶ້ນກ່າວລາຍງານວ່າ: ພະທາດເຈດີ ແມ່ນໜຶ່ງໃນ 8 ກິດຈະກຳຂອງໂຄງການກໍ່ສ້າງວັດອົງຕື້ທີ່ແຂວງຫົວພັນ, ເຊິ່ງໂຄງການທີ່ສ້າງສຳເລັດປະກອບມີ: ສິມ, ສາລາໂຮງທຳ, ກຸດຕິ, ຫໍກອງສັດທາ, ຫໍໄຕປິດົກ, ຫ້ອງນ້ຳ, ປະຕູໂຂງ ແລະອື່ນໆ. ສ່ວນໂຄງການສ້າງພະເຈດີຫາກໍ່ສຳເລັດເມື່ອບໍ່ດົນມານີ້ ເພື່ອເຮັດໃຫ້ພະທາດເຈດີເປັນທີ່ເຄົາລົບບູຊາຂອງປະຊາຊົນບັນດາເຜົ່າ ໂດຍສະເພາະຊາວແຂວງຫົວພັນ, ດັ່ງນັ້ນ, ການນຳແຂວງຫົວພັນ ກໍ່ຄືຄະນະຮັບຜິດຊອບ ໄດ້ເອກະພາບກັນລະດົມການໂມທະນາບໍລິຈາກຄຳ ເພື່ອໂອບໃສ່ຈອມພະທາດເຈດີ ສຳລັບພິທີປະດິດສະຖານໂອບຄຳໃສ່ຈອມພະທາດເຈດີ ຈະໄດ້ຈັດຂຶ້ນພາຍໃນເດືອນພຶດສະພາ 2017 ພ້ອມກັບສະເຫຼີມສະຫຼອງວັນສ້າງຕັ້ງໜ່ວຍແກ້ວຫຼັກເມືອງ ຄົບຮອບ 10 ປີ ແລະ ຜົນສຳເລັດການກໍ່ສ້າງໂຮງຮຽນສົງ.
ດັ່ງນັ້ນ, ຈຶ່ງຂໍເຊີນຊວນທຸກພາກສ່ວນການນຳພັກ-ລັດ, ພະນັກງານ, ນັກທຸລະກິດ ແລະ ພໍ່ແມ່ປະຊາຊົນ ນະຄອນຫຼວງວຽງຈັນ ໂດຍສະເພາະຊາວແຂວງຫົວພັນ ທີ່ດຳລົງຊີວິດຢູ່ນະຄອນຫຼວງວຽງຈັນ ຈົ່ງເສຍສະຫຼະເວລາເຂົ້າຮ່ວມກິດຈະກຳດັ່ງກ່າວນຳກັນ.
ແຫຼ່ງຂ່າວ: ໜັງສືພິມ ວຽງຈັນໃໝ່