ສຳນັກຂ່າວເອເອຟຟີລາຍງານເມື່ອວັນທີ 9 ມີນາ 2017 ຜ່ານມາວ່າ ຄະນະແພດອິນເດຍໄດ້ຖະແຫຼງຜົນການຜ່າຕັດເພື່ອຫຼຸດນໍ້າໜັກໃຫ້ ເອມັນ ອາເໝັດ ອັບດຸລ ເອລ ອາຕີ ແມ່ຍິງຄົນອີຢິບ ອາຍຸ 37 ປີ ທີ່ເຊື່ອວ່າມີນໍ້າໜັກຫຼາຍທີ່ສຸດໃນໂລກໄດ້ສຳເລັດ ເຊິ່ງຊ່ວຍຫຼຸດນໍ້າໜັກຕົວຂອງ ເອມັນ ລົງໄດ້ 100 ກວ່າກິໂລກຣາມ, ເຊິ່ງກ່ອນຜ່າຕັດ ເອມັນ ມີນໍ້າໜັກຕົວຫຼາຍເຖິງ 500 ກິໂລກຣາມ ເຮັດໃຫ້ລາວບໍ່ສາມາດເຄື່ອນໄຫວອອກໄປນອກເຮືອນໄດ້ ເປັນເວລາດົນເຖິງ 20 ກວ່າປີ ຈົນລາວໄດ້ເດີນທາງໄປປິ່ນປົວຕົວເອງຢູ່ນະຄອນຫຼວງມຸມໄບ ໃນເດືອນຜ່ານມາ

ທ່ານ ດຣ ມຸຟຟາຊັລ ລັກດາວາລາ ໂຄສົກ ແລະຫົວໜ້າທີມແພດທີ່ດູແລ ເອມັນ ເວົ້າວ່າ ນໍ້າໜັກຕົວຂອງເອມັນ ຫຼຸດລົງໄປ ເຫຼືອຕໍ່າກວ່າ 400 ກິໂລກຣາມແລ້ວ ນັບຈາກວັນທີ່ລາວເດີນທາງມານະຄອນຫຼວງມຸມໄບ “ເອມັນຫຼຸດນໍ້າໜັກລົງໄດ້ 100 ກວ່າກິໂລກຣາມ ແລະຍັງຄົງຫຼຸດລົງໄປເລື້ອຍໆຈາກການປິ່ນປົວ”