ໂຄງການກໍ່ສ້າງອະນຸສອນສະຖານ ກອງຮ້ອຍລາດຊະວົງ ຢູ່ຖໍ້າແມ ເຂດລາວຮຸ່ງພຽງສາ ເມືອງຊຽງຄໍ້ ແຂວງຫົວພັນ ເປັນໂຄງການຂອງລັດຖະບານ ເຊິ່ງເລີ່ມກໍ່ຕັ້ງປະຕິບັດມາແຕ່ເດືອນມິຖຸນາ 2015 ເປັນຕົ້ນມາ ມາຮອດປະຈຸບັນສຳເລັດເກືອບ 100% ໂດຍແມ່ນບໍລິສັດ ດວງພະສຸກກໍ່ສ້າງ-ສ້ອມແປງເຄຫາສະຖານ-ຂົວທາງ ແລະຊົນລະປະທານ ຈຳກັດ ເປັນຜູ້ລົງທຶນ ແລະ ຮັບເໝົາກໍ່ສ້າງ. ການກໍ່ສ້າງຄັ້ງນີ້ ເພື່ອສ້າງເປັນສະຖານທີ່ທ່ອງທ່ຽວທາງດ້ານປະຫວັດສາດ ໃຫ້ຄົນຮຸ່ນຫຼັງໄດ້ສຶກສາຮຽນຮູ້ ແລະ ເປັນບ່ອນຄົ້ນຄວ້າເຖິງວິລະກຳອັນລ້ຳເລີດຂອງກອງຮ້ອຍລາດຊະວົງໃນເມື່ອກ່ອນ ກໍ່ຄືກອງທັບປະຊາຊົນລາວໃນປັດຈຸບັນ
ທ່ານ ຄຳຫຼ້າ ດວງພະສຸກ ຜູ້ອຳນວຍການບໍລິສັດ ດວງພະສຸກກໍ່ສ້າງ-ສ້ອມແປງເຄຫາສະຖານ-ຂົວທາງ ແລະ ຊົນລະປະທານ ຈຳກັດ ໄດ້ໃຫ້ຮູ້ວ່າ: ປັດຈຸບັນ ໂຄງການແກະສະຫຼັກຮູບປັ້ນປະທານ ໄກສອນ ພົມວິຫານ, ທ່ານ ພົນເອກ ສີສະຫວາດ ແກ້ວບຸນພັນ ແລະ ບັນດານັກຮົບປະຕິວັດລາວ ສະມາຊິກກອງຮ້ອຍລາດຊະວົງ ຈຳນວນ 25 ທ່ານ ທີ່ໄດ້ປະກາດສ້າງຕັ້ງກອງຮ້ອຍລາດຊະວົງ ໃນວັນທີ 20 ມັງກອນ 1949 ເພື່ອນຳໄປປະດິດສະຖານໄວ້ຢູ່ເຂດອະນຸສອນສະຖານຖ້ຳແມເຂດລາວຮຸ່ງ ເຊິ່ງໂຄງການນີ້ ແມ່ນແກະສະຫຼັກຮູບປັ້ນດ້ວຍຫີນທີ່ແຂງແກ່ນ ທີ່ຜະລິດຢູ່ແຂວງນິງບິ່ງ ສສ ຫວຽດນາມ ໂດຍນາຍຊ່າງຫວຽດນາມ. ພາຍຫຼັງສຳເລັດ ກໍ່ໄດ້ຈັດພິທີເຄື່ອນຍ້າຍຈາກສະຖານທີ່ຜະລິດ ມາເຖິງສະຖານທີ່ໂຄງການກໍ່ສ້າງອະນຸສອນສະຖານ ກອງຮ້ອຍລາດຊະວົງ ຢູ່ຈຸດຖ້ຳແມສຳເລັດ ໃນວັນທີ 4 ມີນາ 2017 ໃຊ້ເວລາເຄື່ອນຍ້າຍເປັນເວລາ 4 ວັນ ປັດຈຸບັນ ກຳລັງຫ້າງຫາກະກຽມນຳເອົາຮູບປັ້ນ ເພື່ອປະດິດສະຖານໄວ້ທີ່ສະຖານທີ່ດັ່ງກ່າວ ເຊິ່ງການເຄື່ອນຍ້າຍຄັ້ງນີ້ໄດ້ມີການນຳແຂວງ, ເມືອງ ແລະ ປະຊາຊົນບັນດາເຜົ່າແຂວງຫົວພັນ ເຂົ້າຮ່ວມແຕ່ຕົ້ນທາງຮອດປາຍທາງດ້ວຍບັນຍາກາດທີ່ຟົດຟື້ນ
ສຳລັບພິທີປະດິດສະຖານຮູບປັ້ນ ຢູ່ໂຄງການອະນຸສອນສະຖານກອງຮ້ອຍລາດຊະວົງ ຢ່າງເປັນທາງການ ຈະໄດ້ຈັດຂຶ້ນໃນທ້າຍເດືອນມີນາ 2017, ເຊິ່ງກ່ອນໜ້ານີ້ໄດ້ແຈ້ງໄປກ່ອນວ່າ ຈະໄດ້ຈັດຂຶ້ນລະຫວ່າງວັນທີ 15-17 ມີນາ 2017 ແຕ່ໄດ້ເລື່ອນເວລາອອກໄປອີກ ເຊິ່ງລາຍລະອຽດຈະແຈ້ງໃຫ້ຊາບຕາມພາຍຫຼັງ.
ແຫຼ່ງຂ່າວ: ໜັງສືພິມ ວຽງຈັນໃໝ່