ແຂວງຊຽງຂວາງ ຕັ້ງຢູ່ທາງພາກເໜືອຂອງປະເທດລາວ, ມີເນື້ອທີ່ທັງໝົດ 16 ພັນກິໂລຕາແມັດ, ມີປະຊາຊົນຫຼາຍຊົນເຜົ່າອາໄສຢູ່ຮ່ວມກັນປະມານ 3 ແສນຄົນ ແລະມີທັງໝົດ 7 ເມືອງເຊັ່ນ: ເມືອງແປກ, ເມືອງຄູນ, ເມືອງຄຳ, ເມືອງຜາໄຊ, ເມືອງກູດ, ເມືອງໜອງແຮດແລະ ເມືອງໝອກ ເຊິ່ງມີແຫຼ່ງທ່ອງທ່ຽວຫຼາກຫຼາຍທີ່ສວຍງາມ ແລະລືຊື່ອີກຫຼວງຫຼາຍ ດັ່ງຄຳຂວັນທີ່ວ່າ: “ຊຽງຂວາງ ພູກູດມີໄຊ ທົ່ງໄຫຫີນລືນາມ ສາວງາມເມືອງພວນ ເຊີນຊວນທ່ຽວຊົມ ແຂວງວິລະຊົນ” ໂດຍສະເພາະແມ່ນທົ່ງໄຫຫີນທີ່ໜ້າອັດສະຈັນໃຈ ທີ່ເຮັດໃຫ້ມີນັກທ່ອງທ່ຽວທັງພາຍໃນ ແລະຕ່າງປະເທດໃຫ້ຄວາມສົນໃຈຢ້ຽມຊົມຢ່າງບໍ່ຂາດ ເຊິ່ງປີ 2016 ຜ່ານມາມີນັກທ່ອງທ່ຽວເຂົ້າມາທ່ຽວຊົມທັງໝົດ 74.166 ຄົນ, ໃນນັ້ນມີນັກທ່ອງທ່ຽວຕ່າງປະເທດ 62.346 ຄົນ ສ້າງລາຍຮັບໄດ້ 7.209.571 ໂດລາສະຫະລັດ.
ປະຈຸບັນທົ່ວແຂວງຊຽງຂວາງ ມີສະຖານທີ່ພັກທັງໝົດ 122 ແຫ່ງ, ແບ່ງເປັນໂຮງແຮມ 13 ແຫ່ງ, ເຮືອນພັກ 106 ແຫ່ງ ແລະມີຣີສອດ 3 ແຫ່ງ, ສຳລັບຮ້ານອາຫານມີທັງໝົດ 183 ຮ້ານ, ສະຖານທີ່ທ່ອງທ່ຽວມີທັງໝົດ 41 ແຫ່ງ, ເຊິ່ງຫຼາຍກວ່າໝູ່ແມ່ນແຫຼ່ງທ່ອງທ່ຽວທາງວັດທະນະທຳ 18 ແຫ່ງ, ຮອງລົງມາແມ່ນທຳມະຊາດ 12 ແຫ່ງ, ນອກນັ້ນກໍແມ່ນສະຖານທີ່ທ່ອງທ່ຽວທີ່ສ້າງຂຶ້ນ.
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ