ເວັບໄຊຂ່າວສົດ ລາຍງານເມື່ອວັນທີ 4 ມີນາ 2017 ວ່າ ຄະນະສະມາຊິກສະຫະພາບຢຸໂຣບ ລົງມະຕິຄັ້ງໃຫຍ່ ໃນການຍົກເລີກ ຟຣີວິຊ່າໃຫ້ແກ່ຊາວອາເມລິກາ ເມື່ອວັນທີ 2 ມີນາ ທີ່ຜ່ານມາ ເພື່ອຕອບໂຕ້ສະຫະລັດທີ່ເລືອກປະຕິບັດກວດຄົນເຂົ້າເມືອງຕໍ່ສະມາຊິກອີຢູແບບບໍ່ສະເໝີພາບກັນ ໂດຍມີ 5 ປະເທດຕ້ອງຂໍວິຊ່າ. ມະຕິດັ່ງກ່າວນີ້ໄດ້ສົ່ງໄປທີ່ຄະນະກຳມະທິການ ຢຸໂຣບ ຝ່າຍບໍລິຫານ ເພື່ອພິຈາລະນາໃນທາງປະຕິບັດພາຍໃນ 2 ເດືອນຕໍ່ໜ້າ ຫາກມີການບັງຄັບໃຊ້ແທ້ຈະສົ່ງຜົນກະທົບດ້ານລົບຕໍ່ເສດຖະກິດອີຢູ 

ໃນກໍລະນີນີ້ ອີຢູໄດ້ໃຫ້ເວລາສະຫະລັດອາເມລິກາທົບທວນເລື່ອງດັ່ງກ່າວມາດົນກວ່າ 2 ປີແລ້ວ ແລະ ເລີຍກຳນົດມາແຕ່ປີ 2016 ເຊິ່ງອີຢູກໍ່ຍັງບໍ່ທັນໄດ້ໃຊ້ມາດຕະການໃດໆ ເພາະເຫັນວ່າສະຫະລັດມີການປ່ຽນແປງລັດຖະບານໃໝ່ ແຕ່ຂໍ້ຮຽກຮ້ອງໃນເລື່ອງນີ້ໄດ້ກັບມາອີກຄັ້ງ ຍ້ອນຄວາມບໍ່ລົງຮອຍກັນລະຫວ່າງນັກການເມືອງ ຢຸໂຣບບາງສ່ວນ ກັບ ລັດຖະບານສະຫະລັດຂອງທ່ານ ໂດນັລ ທຣັມ ທີ່ເລີ່ມສະແດງອອກມາໃຫ້ເຫັນເປັນໄລຍະ ນັບຕັ້ງແຕ່ການປະນາມມາດຕະການກີດກັ້ນພົນລະເມືອງ 7 ຊາດມຸສລິມຂອງລັດຖະບານທຣັມ ຕາມດ້ວຍການຮຽກຮ້ອງໃຫ້ລັດຖະບານອີຢູປະຕິເສດການຮັບຕຳແໜ່ງຂອງ ທ່ານ ເທັກ ມັລລັອກ ທີ່ໄດ້ຮັບການຄາດໝາຍວ່າຈະມາເປັນທູດປະຈຳອີຢູ ເຊິ່ງນັບແຕ່ນັ້ນມາສະຫະລັດຍັງບໍ່ມີທ່າທີວ່າຈະເລືອກໃຜຂຶ້ນມາເປັນທູດສະຫະລັດປະຈຳອີຢູ

ຕໍ່ມາອີຢູຍັງຫັນໄປບັນລຸຂໍ້ຕົກລົງດ້ານເສດຖະກິດ ແລະ ການຄ້າ ຫຼື ເຊຕ້າ ກັບ ການາກາ ມີຜົນໃຫ້ການາກາເປີດຊາຍແດນຕ້ອນຮັບນັກທ່ອງທ່ຽວສະມາຊິກອີຢູທຸກປະເທດພາຍໃນປີນີ້ ໂດຍບໍ່ຕ້ອງຂໍວິຊ່າ ກາຍເປັນຂໍ້ປຽບທຽບກັບກໍລະນີຂອງສະຫະລັດ