ຫວ່າງບໍ່ດົນຜ່ານມານີ້ ທ່ານ ລຽນ ທິແກ້ວ ລັດຖະມົນຕີ ກະຊວງກະສິກຳ-ປ່າໄມ້ ພ້ອມດ້ວຍຄະນະ ໄດ້ລົງຊຸກຍູ້ ໂຄງການປູກຊາໝ້ຽງ ຢູ່ເມືອງໄຊຊະຖານ ແຂວງໄຊຍະບູລີ ໂດຍການຕ້ອນຮັບ ແລະ ນຳ ພາເບິ່ງສະຖານທີ່ດັ່ງກ່າວ ໂດຍທ່ານ ພົງສະຫວັນ ສິດທະ ວົງ ເຈົ້າແຂວງໄຊຍະບູລີ.
ທ່ານ ລຽນ ທິແກ້ວ ໄດ້ຮັບຟັງການລາຍງານຫຍໍ້ກ່ຽວກັບຕົ້ນກຳເນີດ ຂອງຊາໝ້ຽງຈາກທ່ານ ກອງສີ ວົງສີ ເຈົ້າເມືອງໄຊຊະຖານ, ຊາໝ້ຽງທຳມະຊາດໃນເມື່ອກ່ອນ ປະຊາຊົນແມ່ນໄດ້ນຳມາຜະລິດເປັນໝ້ຽງເພື່ອອົມ ແລະ ສົ່ງອອກຂາຍຕາມທ້ອງຕະຫຼາດ, ປັດຈຸບັນ ພາຍຫຼັງ ທີ່ໄດ້ສ້າງເປັນເມືອງດັ່ງກ່າວ, ການນຳຂອງເມືອງ ແລະ ແຂວງ ກໍໄດ້ສົ່ງເສີມໃຫ້ປະຊາຊົນຫັນຈາກການຜະລິດໝ້ຽງ ເພື່ອອົມນັ້ນ ມາເປັນການຜະລິດເປັນຊາໝ້ຽງແທນ ແລະ ໃຫ້ປະຊາຊົນຂະຫຍາຍ ແລະ ປູກຊາໝ້ຽງອອກອີກ.
ປັດຈຸບັນ ມີເນື້ອທີ່ປູກຊາໝ້ຽງທັງໝົດ 650 ກວ່າເຮັກຕາ, ຈາກນັ້ນ ທ່ານເຈົ້າແຂວງ ກໍໄດ້ນຳພາ ທ່ານລັດຖະມົນຕີ ພ້ອມຄະນະລົງ ເບິ່ງສວນຊາໝ້ຽງ, ສູນທົດລອງ ປູກກາເຟຂອງ ທ່ານ ວົງແກ້ວ ຫຼວງສຳພັນ ແລະ ໃນຕອນ ບ່າຍຂອງວັນດຽວກັນ ຄະນະ ດັ່ງກ່າວ ກໍໄດ້ຢ້ຽມຢາມເບິ່ງ ຟາມລ້ຽງຄວາຍຂອງ ທ່ານ ນາງ ຊວນ ແລະ ເບິ່ງສູນທົດລອງ ປູກເຂົ້າຊີວະພາບ ໂດຍນຳໃຊ້ ເຕັກໂນໂລຊີທີ່ທັນສະໄໝຂອງ ບໍລິສັດລາວກ້າວໜ້າຢູ່ເມືອງ ພຽງ ຕື່ມອີກ
ແຫຼ່ງຂ່າວ: ໜັງສືພິມ ປະຊາຊົນ