ເວັບໄຊຊີເອັນເອັນລາຍງານເມື່ອວັນທີ 5 ມີນາ 2017 ຜ່ານມາວ່າ ພີ່ນ້ອງຜູ້ເຄາະຮ້າຍຍົນສາຍການບິນມາເລເຊຍແອໄລນ໌ ຖ້ຽວບິນ MH370 ທີ່ຫາຍສາບສູນ ໄດ້ເປີດໂຄງການລະດົມທຶນຈາກເອກະຊົນ ເພື່ອຄົ້ນຫາຍົນທີ່ສູນຫາຍໄປໃນ 3 ປີກ່ອນ, ຫຼັງຈາກທາງການອອສເຕຣເລຍ, ຈີນ ແລະມາເລເຊຍ ປະກາດຢຸດການຄົ້ນຫາໃນເດືອນມັງກອນຜ່ານມາ
ຈຽງ ຮຸຍ ລູກຊາຍຂອງແມ່ຍິງຄົນໜຶ່ງ ທີ່ເປັນໜຶ່ງໃນຜູ້ໂດຍສານຖ້ຽວບິນ MH370 ເວົ້າວ່າ ກຸ່ມຍາດພີ່ນ້ອງຂອງຜູ້ໂດຍສານໃນຍົນດັ່ງກ່າວ ກຳລັງດຳເນີນໂຄງການ ເພື່ອຫາທຶນຈາກນານາຊາດ ທີ່ມາຈາກ ເງິນບໍລິຈາກຈາກທຸກຝ່າຍທີ່ກ່ຽວຂ້ອງກັບຖ້ຽວບິນດັ່ງກ່າວ ແລະເຊື່ອວ່າຫຼາຍໆບໍລິສັດຄວນຮ່ວມບໍລິຈາກເງິນທຶນ ລວມເຖິງລັດຖະບານຂອງ 14 ຊາດ ທີ່ມີຜູ້ໂດຍສານໃນຍົນ ແລະລວມເຖິງບໍລິສັດໂບອິ້ງ ແລະລັດຖະບານມາເລເຊຍ, ເຊິ່ງຖ້າໄດ້ເງິນມາ “ເງິນຈະຖືກເອົາໄປລົງທຶນ ແລະຜົນຕອບແທນລາຍປີ ແລະດອກເບ້ຍ ຈະຖືກເອົາໄປໃຊ້ເປັນງົບໃນການຄົ້ນຫາຖ້ຽວບິນ MH370 ແລະເມື່ອຄົ້ນຫາເຄື່ອງບິນພົບແລ້ວ ເງິນຕົ້ນຈະຖືກສົ່ງຄືນໃຫ້ກັບຜູ້ບໍລິຈາກໂດຍບໍ່ມີດອກເບ້ຍ”
ການຕັດສິນໃຈດັ່ງກ່າວມີຂຶ້ນຫຼັງເດືອນມັງກອນຜ່ານມາ ຫຼັງທີມຄົ້ນຫາ 3 ຊາດ ປະກາດຢຸດຕິການຄົ້ນຫາຖ້ຽວບິນເອັມເອຊ 370 ເຊິ່ງບອກວ່າ ເຖິງຈະໃຊ້ຄວາມພະຍາຍາມໃຊ້ເທັກໂນໂລຢີທາງວິທະຍາສາດທີ່ທັນສະໄໝທີ່ສຸດ, ລວມເຖິງໄດ້ຮັບຄວາມຊ່ວຍເຫຼືອຈາກຜູ້ຊ່ຽວຊານມືອາຊີບແລ້ວ ກໍຍັງບໍ່ສາມາດຫາຕຳແໜ່ງຂອງຍົນໄດ້