ສຳນັກຂ່າວຕ່າງປະເທດລາຍງານເມື່ອວັນທີ 6 ມີນາ 2017 ຜ່ານມາວ່າ ແອຣ໌ອິນເດຍ ສາຍການບິນແຫ່ງຊາດຂອງປະເທດອິນເດຍ ປະກາດອ້າງສ້າງບັນທຶກໃໝ່ໃຫ້ກັບວົງການອຸດສະຫະກຳການບິນພານິດ ຈາກການໃຫ້ບໍລິການຖ້ຽວບິນຮອບໂລກ ຖ້ຽວບິນທຳອິດຂອງໂລກ ເຊິ່ງທີມງານທີ່ໃຫ້ບໍລິການໃນຖ້ຽວບິນນີ້ເປັນຜູ້ຍິງທັງໝົດ
ຖ້ຽວບິນນີ້ ເປັນຖ້ຽວບິນພານິດ ທີ່ໃຊ້ເຄື່ອງບິນໂບອິ້ງ 777 ບິນຈາກນະຄອນຫຼວງນິວເດລີ ປະເທດອິນເດຍ ໄປຫານະຄອນຊານຟຣານຊິສໂກ ຂອງສະຫະລັດອາເມລິກາ ໃນວັນທີ 27 ກຸມພາ 2017 ຜ່ານມາແລະບິນກັບ ນະຄອນຫຼວງນິວເດລີ ໃນວັນທີ 3 ມີນາ 2017, ເຊິ່ງມີຜູ້ໂດຍສານ, ພະນັກງານ, ລວມເຖິງເຄົາເຕີເຊັກອິນ ພະນັກງານພາກພື້ນດິນອື່ນໆ ແລະເຈົ້າໜ້າທີ່ຫໍຄວບຄຸມການບິນ ເປັນຜູ້ຍິງທັງໝົດເຊັ່ນກັນ ເຊິ່ງຖືເປັນຄັ້ງທຳອິດ ທີ່ມີຖ້ຽວບິນບໍລິການຮອບໂລກດ້ວຍຜູ້ຍິງທັງໝົດແບບນີ້
ແອຣ໌ອິນເດຍ ຈະໃຫ້ບໍລິການຖ້ຽວບິນ ທີ່ໃຊ້ທີມງານເປັນຜູ້ຍິງລ້ວນທັງໝົດເພີ່ມຂຶ້ນອີກໃນອາທິດນີ້ ເພື່ອຮ່ວມສະຫຼອງໃນວັນແມ່ຍິງສາກົນ ວັນທີ 8 ມີນາ 2017 ນີ້