ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໃຫ້ຮູ້ວ່າ: ແຕ່ນີ້ຮອດປີ 2020 ຂະແໜງການຕົນຈະສຸມໃສ່ການປົກປັກຮັກສາສະພາບແວດລ້ອມ ແລະ ຊັບພະຍາກອນທໍາມະຊາດຕາມທິດພັດທະນາທີ່ຍືນຍົງ, ໂດຍເນັ້ນໃສ່ວຽກງານຈັດສັນທີ່ດິນຢ່າງເປັນລະບົບ, ໂດຍສະເພາະຈັດແບ່ງ 8 ປະເພດທີ່ດິນຢູ່ບັນດາທ້ອງຖິ່ນ, ຕິດຕາມກວດກາຂໍ້ມູນການເຊົ່າ, ສໍາປະທານທີ່ດິນໃຫ້ຄົບຖ້ວນລວມສູນ ແລະ ເປັນເອກະພາບ, ຈັດຕັ້ງປະຕິບັດແຜນຟື້ນຟູປ່າໄມ້ທໍາມະຊາດຈາກຕົວເລກເນື້ອທີ່ປົກຫຸ້ມປະມານ 40% ໃຫ້ເພີ່ມເປັນ 70% ຂອງເນື້ອທີ່ທົ່ວປະເທດ ເພື່ອຫຼຸດຜ່ອນບັນຫາອາຍພິດເຮືອນແກ້ວ, ເຊິ່ງເປັນສາເຫດຕົ້ນຕໍເຮັດໃຫ້ເກີດສະພາ ວະໂລກຮ້ອນ
ຄຽງຄູ່ການປົກປັກຮັກສາທໍາມະຊາດໃຫ້ຍືນຍົງນັ້ນ, ກໍແມ່ນການອານຸລັກສັດນໍ້າ-ສັດປ່າ ແລະຕ້ອງໄດ້ເອົາໃຈໃສ່ສໍາຫລວດ ແລະ ຕິດຕາມກວດກາປະເມີນປະຊາກອນສັດນ້ຳ ແລະສັດປ່າໃນເຂດປ່າສະຫງວນ-ປ່າປ້ອງກັນແຫ່ງຊາດ ໃນທົ່ວປະເທດ ແລະປັບປຸງການຂຶ້ນບັນຊີຊີວະນາໆພັນທີ່ຫາຍາກ ແລະໃກ້ສູນພັນ, ສ້າງສວນສາທິດກ່ຽວກັບການຄຸ້ມຄອງຊັບພະຍາກອນນ້ຳແບບປະສົມປະສານ ເພື່ອເປັນບ່ອນສຶກສາ, ຄົ້ນຄວ້າ, ຝຶກອົບຮົມ, ທັດສະນະສຶກສາ, ແລກປ່ຽນບົດຮຽນ ແລະ ປູກຈິດສໍານຶກໃຫ້ມວນຊົນຢ່າງກ້ວາງຂວາງ, ສ້າງຂໍ້ກໍານົດ, ກົນໄກການສ້າງຕົວເມືອງສີຂຽວ, ຄວບຄຸມມົນລະພິດທາງນໍ້າ, ອາກາດ ແລະຫລຸດຜ່ອນສິ່ງເສດເຫລືອຈາກສານເຄມີອັນຕະລາຍຕ່າງໆລົງເທື່ອລະກ້າວ.
ແຫຼ່ງຂ່າວ: ໜັງສືພິມ ລາວພັດທະນາ