ໃນວັນທີ 27 ກຸມພາ 2017 ຜ່ານມາທີ່ຫ້ອງປະຊຸມພະແນກແຜນການ ແລະການລົງທຶນແຂວງສະຫວັນນະເຂດ ໄດ້ຈັດພິທີປະກາດການຈັດຕັ້ງປະທານສານປະຊາຊົນແຂວງສະຫວັນນະເຂດຄົນໃໝ່ ເຊິ່ງເປັນປະທານໂດຍ ທ່ານໂພໄຊ ໄຊຍະສອນ ກຳມະການສຳຮອງສູນກາງພັກ ຮອງເຈົ້າແຂວງສະຫວັນນະເຂດ, ທ່ານ ຄຳພາ ແສງດາຣາ ຮອງປະທານປະຊາຊົນສູງສຸດ ແລະການຈັດຕັ້ງຂັ້ນສູນກາງ ແລະທ້ອງຖິ່ນເຂົ້າຮ່ວມ
ທ່ານ ສາກົນ ໄຊຍະລາດ ຫົວໜ້າພະແນກກົງຈັກການຈັດຕັ້ງສານປະຊາຊົນສູງສຸດໄດ້ຂຶ້ນຜ່ານມາຕິ ຂອງຄະນະປະຈຳສະພາແຫ່ງຊາດ ເລກທີ 0109 ລົງວັນທີ 18 ກໍລະກົດ 2016 ວ່າດ້ວຍການແຕ່ງຕັ້ງປະທານສານປະຊາຊົນທ້ອງຖິ່ນ ເຊິ່ງເຫັນດີແຕ່ງຕັ້ງ ທ່ານ ພູຄຳ ເລນິນ ເປັນປະທານສານປະຊາຊົນແຂວງສະຫວັນນະເຂດ, ຈາກນັ້ນ ທ່ານ ຄຳພາ ແສງດາຣາ ຮອງປະທານປະຊາຊົນສູງສຸດ ກໍໄດ້ເປັນກຽດປະດັບທະນູບ່າ ແລະມອບຂໍ້ຕົກລົງ ຂອງຄະນະປະຈຳສະພາແຫ່ງຊາດ ວ່າດ້ວຍການແຕ່ງຕັ້ງໜ້າທີ່ອັນມີກຽດສະຫງ່າ
ຈາກນັ້ນກໍມີພິທີມອບ-ຮັບໜ້າທີ່ ລະຫວ່າງທ່ານກຽງສັກ ບຸນທາວົງ ຮັກສາການປະທານສານປະຊາຊົນແຂວງ ແລະທ່ານ ຄຳພູ ເລນິນ ປະທານສານປະຊາຊົນຢ່າງເປັນທາງການ
ໃນໂອກາດດຽວກັນ ທ່ານ ພູຄຳ ເລນິນ ກໍໄດ້ປະຕິຍານຕົນຕໍ່ໜ້າການນຳພັກ-ລັດ ທີ່ໄວ້ວາງໃຈມອບໜ້າທີ່ອັນມີກຽດສະຫງ່ານີ້ວ່າ: ຈະຈົງຮັກພັກດີຕໍ່ພັກລັດ ກໍ່ຄືປະຊາຊົນ, ຈະຊື່ສັດສຸດຈະລິດຕໍ່ໜ້າທີ່ວຽກງານ, ຈະປະຕິບັດຕາມລະບຽບຕຸລະການທີ່ວ່າ: ຈະບໍ່ສວຍຊ້ໜ້າທີ່ຕຳແໜ່ງເພື່ອຜົນປະໂຫຍດຂອງຕົນ, ຈະບໍ່ບັງຂັບນາບຂູ່ລະເມີດຕໍ່ການດຳເນີນຄະດີ, ຈະບໍ່ລຳອຽງເຂົ້າຂ້າງອອກຂາທີ່ພາໃຫ້ການດຳເນີນຄະດີບໍ່ຍຸດຕິທຳ, ຈະບໍ່ຮັບສິນບົນ, ຈະບໍ່ເປັນທີ່ປຶກສາເພື່ອຫາຜົນປະໂຫຍດ, ຈະບໍ່ສ້າງຄວາມແຕກແຍກ ແລະຈະບໍ່ເຮັດໃນສິ່ງທີ່ຜິດກົດໝາຍ.
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ