ສຳນັກຂ່າວເອເອຟຟີລາຍງານ ເມື່ອວັນທີ 1 ມີນາ 2017 ຜ່ານມາວ່າ ສົມເດັດພະລາຊາທິບໍດີ ຊັລມານ ບິນ ອັບດຸລ ອາຊິຊ ແຫ່ງຊາອຸດິອາຣະເບຍ ໄດ້ສະເດັດໄປຢ້ຽມຢາມອິນໂດເນເຊຍເປັນຄັ້ງທຳອິດໃນຮອບ 47 ປີ ແລະໄດ້ຊົງລົງນາມກັບ ທ່ານ ໂຈໂກ ວິໂດໂດ ປະທານາທິບໍດີອິນໂດເນເຊຍ ໃນຂໍ້ຕົກລົງວ່າດ້ວຍການຮ່ວມມື 11 ສະບັບ ເຊິ່ງມີຕັ້ງແຕ່ເລື່ອງການຄ້າ ຈົນຮອດເລື່ອງການບິນ, ວິທະຍາສາດ, ສຸຂະພາບ ແລະການຮ່ວມມືປາບປາມອາດຊະຍາກຳ, ນອກຈາກນັ້ນຍັງມີການລົງທຶນດ້ານພະລັງງານນໍ້າມັນ ລະຫວ່າງບໍລິສັດລັດວິສາຫະກິດ ອາຣັມໂກ ກັບເປີຕາມິນາ ມູນຄ່າ 6,000 ລ້ານດອນລາ
ການສະເດັດຢ້ຽມຢາມ ຂອງປະມຸກຊາອຸດິອາຣະເບຍໃນຮອບ 47 ປີຄັ້ງນີ້ ມີຜູ້ຕິດຕາມກວ່າ 1,000 ຄົນ ລວມເຖິງບັນດາເຈົ້າຊາຍ ແລະລັດຖະມົນຕີ, ນອກນັ້ນຍັງມີເຄື່ອງໃຊ້ທີ່ຂົນສົ່ງທາງອາກາດກວ່າ 460 ໂຕນ ລວມເຖິງລົດລີມູຊີນ ແລະຂັ້ນໄດເລື່ອນ
ທາງດ້ານອິນໂດເນເຊຍໄດ້ຈັດພິທີຕ້ອນຮັບ ສົມເດັດພະລາຊາທິບໍດີ ຊັລມານ ບິນ ອັບດຸລ ອາຊິຊ ແຫ່ງຊາອຸດິອາຣະເບຍ ຢູ່ທີ່ພະລາຊະວັງໂບກໍ ທາງພາກໃຕ້ຂອງນະຄອນຫຼວງຈາກາຕາ ຢ່າງສົມພະກຽດ, ນອກນັ້ນຍັງລະດົມເຊບ 150 ກວ່າຄົນ ເພື່ອເຮັດອາຫານໃນງານລ້ຽງຕ້ອນຮັບ
ທ່ານ ວິໂດໂດ ເວົ້າວ່າ ການສະເດັດຢ້ຽມຢາມຄັ້ງນີ້ເປັນປະຫວັດສາດ ໃນຖານະທີ່ອິນໂດເນເຊຍເປັນປະເທດທີ່ມີປະຊາກອນມຸດສະລິມຫຼາຍທີ່ສຸດໃນໂລກ ແລະມີຄວາມສຳພັນໃກ້ຊິດກັບຊາອຸດິອາຣະເບຍ