ຕາມການລາຍງານຂອງຂະແໜງລ້ຽງສັດ ແລະການປະມົງພະແນກກະສິກໍາ-ປ່າໄມ້ນະຄອນຫຼວງວຽງຈັນໃຫ້ຮູ້ວ່າ: ໄດ້ແຕ່ງຕັ້ງໜ່ວຍງານ ລົງຕິດຕາມກວດກາສະພາບການລັກລອບໃຊ້ສານກັນບູດ (ຟອກໂມນ) ແຊ່ໃນອາຫານສົດ, ໂດຍສະເພາະປະເພດຊີ້ນ, ປາ, ເຄື່ອງໃນສັດ ແລະອາຫານທະເລຕ່າງໆ ຂອງຊາວຄ້າຂາຍຕາມທ້ອງຕະຫລາດໃຫຍ່ ໃນຕົວເມືອງ ໃນໄລຍະເດືອນກຸມພາຜ່ານມາ ປະກົດວ່າສະພາບດັ່ງກ່າວໄດ້ມີທ່າອ່ຽງຫລຸດລົງຫລາຍ ແລະ ຢູ່ຕະຫລາດຫລາຍແຫ່ງກໍບໍ່ພົບເຫັນການໃຊ້ສານດັ່ງກ່າວ.
ຍ້ອນຂະແໜງກ່ຽວຂ້ອງໄດ້ເອົາໃຈໃສ່ກວດກາເປັນປະຈຳ ແລະສຶກສາອົບຮົມແມ່ຄ້າທີ່ສວຍໂອກາດນຳໃຊ້ສານດັ່ງກ່າວຕາມກໍລະນີໜັກເບົາ ເພື່ອຄວບຄຸມການດ້ານໂພສະນາການໃຫ້ຖືກຕ້ອງຕາມຫຼັກອະນາໄມ ແລະບໍ່ມີສານປົນເປື້ອນຕ່າງໆ ທີ່ສົ່ງຜົນບໍ່ດີຕໍ່ສຸຂະພາບຜູ້ບໍລິໂພກ
ສານດັ່ງກ່າວ ເປັນສານເຄມີທາງການແພດ ຖ້າຜູ້ໃດຫາກກິນ ຫຼືດົມສານດັ່ງກ່າວເຂົ້າສູ່ຮ່າງກາຍ ຈະສົ່ງຜົນກະທົບສູ່ລະບົບຫາຍໃຈ, ສະໝອງ, ລະບົບຍ່ອຍອາຫານ ແລະທຳລາຍຈຸລັງຕ່າງໆ ເຮັດໃຫ້ສຸພາບອ່ອນເພະ ແລະພະຍາດອື່ນໆແຊກຊ້ອນ ໂດຍສະເພາະແມ່ນພະຍາດມະເຮັງ
ແຫຼ່ງຂ່າວ: ໜັງສືພິມ ລາວພັດທະນາ