ສຳນັກຂ່າວເອເອຟຟີລາຍງານ ເມື່ອວັນທີ 28 ກຸມພາ 2017 ຜ່ານມາວ່າ ຄະນະໄອຍະການພິເສດສັ່ງຟ້ອງ ທ່ານ ອີ ແຈຢອງ ຮອງປະທານກຳມະການບໍລິສັດຊໍາຊຸງ ຜູ້ທີ່ຄຸມບໍລິສັດໃຫຍ່ຂອງເກົາຫຼີໃຕ້ ໃນຂໍ້ຫາຕິດສິນບົນ ແລະຢັກຢອກເງິນໄປຕ່າງປະເທດ ຫຼັງການສອບສວນລະດັບມະຫາກາບ ເນື່ອງຈາກໄປພົວພັນຄະດີການເມືອງ ທີ່ທ່ານນາງ ປາກ ກຶນເຮ ປະທານາທິບໍດີ ຖືກສະມາຊິກລັດຖະສະພາ ລົງມະຕິຖອດຖອນ

ຫຼັງຈາກທີ່ໄອຍະການສັ່ງຟ້ອງ ຜູ້ບໍລິຫານຂອງຊຳຊຸງ 3 ຄົນ ຈາກທັງໝົດ 5 ຄົນລາອອກທັນທີ, ພ້ອມກັບຍຸບສຳນັກງານຍຸດທະສາດອະນາຄົດທີ່ໄປເບິ່ງວຽກຢູ່ຕ່າງປະເທດ ແຕ່ການລາອອກດັ່ງກ່າວ ບໍ່ມີ ທ່ານ ອີ ແຈຢອງ ລວມຢູ່ນຳ ຂະນະທີ່ສະຖານະຂອງຝ່າຍບໍລິຫານຂອງບໍລິສັດສູ່ພາວະທີ່ບໍ່ແນ່ນອນ ແຕ່ບໍລິສັດຖະແຫຼງຂ່າວວ່າ ຄວາມເຄື່ອນໄຫວຄັ້ງນີ້ ເປັນໄປຕາມແຜນປະຕິຮູບ

ໃນຄະດີດັ່ງກ່າວ ທ່ານ ແຈຢອງ ຖືກກ່າວຫາວ່າ ໃຫ້ສິນບົນ ທ່ານນາງ ຊະເວ ຊຸນຊິລ ໝູ່ສະໜິດຂອງປະທານາທິບໍດີ ປາກ ເກືອບ 40 ລ້ານດອນລາ ເພື່ອຫວັງຜົນໃຫ້ໄດ້ຮັບການອະນຸມັດຈາກລັດໃນການລວບລວມກິດຈະການໃນບໍລິສັດ ອີກທັງຍັງເຊື່ອງຊັບສິນຈຳນວນຫນຶ່ງໃນຕ່າງປະເທດ ແຕ່ຖືກປະຕິເສດຂໍ້ກ່າວຫາທັງໝົດ

ຕໍ່ຈາກນີ້ ໄອຍະການພິເສດ ທີ່ໄດ້ຮັບການແຕ່ງຕັ້ງ ຈາກລັດຖະສະພາ ຈະເລັ່ງປະສານງານກັບໄອຍະການລັດ ເພື່ອດຳເນີນການຕາມຂັ້ນຕອນຕໍ່ໄປ ເນື່ອງຈາກນາຍົກລັດຖະມົນຕີຮວາງ ຄະໂຍອັນ ຮັກສາການປະທທທທານາທິບໍດີ ບໍ່ອະນຸຍາດໃຫ້ໄອຍະການພິເສດ ຂະຫຍາຍເວລາກວດສອບ ເພີ່ມເຕີມດ້ວຍເຫດຜົນດ້ານຄວາມໝັ້ນຄົງທາດ້ານການເມືອງ