ໃນວັນທີ 27 ກຸມພາ 2017 ຜ່ານມາ ໄດ້ມີພິທີມອບ-ຮັບ ໂຄງການວຽງຈັນທົດລອງ ເພື່ອປັບປຸງຖະໜົນເຈົ້າອະນຸວົງ ແລະຖະໜົນຝຣັ່ງຊົວງິນ ຢູ່ໃນເຂດບ້ານວັດຈັນ ແລະບ້ານມີໄຊ ເມືອງຈັນທະບູລີ ນະຄອນຫຼວງວຽງຈັນ (ນວ) ໂດຍເປັນປະທານຂອງທ່ານ ແກ້ວພິລາວັນ ອາໄພລາດ ຮອງເຈົ້າຄອງ ນວ, ທ່ານ ທາເກຊິ ຣິກິຮະຣະ ເອກອັກຄະລັດຖະທູດຍີ່ປຸ່ນ ປະຈຳລາວ, ມີເຈົ້າເມືອງ, ຫົວໜ້າຫ້ອງການໄຈກາ, ຫົວໜ້າພະແນກ ຍທຂ ນວ ແລະອຳນາດການປົກຄອງບ້ານເຂົ້າຮ່ວມ
ໂຄງການນີ້ແມ່ນວຽກໜຶ່ງຂອງໂຄງການທົດລອງ ເພື່ອສົ່ງເສີມ ແລະປັບປຸງທິວທັດຕົວເມືອງຢູ່ເຂດປົກປັກຮັກສາຕົວເມືອງເກົ່າ ນວ (ເຂດແຄມຂອງ) ພາຍໃຕ້ໂຄງການຄຸ້ມຄອງການພັດທະນາຕົວເມືອງ ນວ ເຊິ່ງໄດ້ຮັບການຊ່ວຍເຫຼືອລ້າຈາກລັດຖະບານຍີ່ປຸ່ນ ໂດຍຜ່ານອົງການໄຈກາ ມູນຄ່າ 2,3 ຕື້ກີບ ເຊິ່ງເລີ່ມປະຕິບັດເດືອນທັນວາ 2016 ແລະສຳເລັດໃນເດືອນກຸມພາ 2017 ໂດຍອົງການໄຈກາ ແລະທີມງານຝ່າຍລາວ ຈັດຕັ້ງປະຕິບັດຮ່ວມກັນຄື: ພະແນກໂຍທາທິການ ແລະ ຂົນສົ່ງ ນວ, ສະຖາບັນໂຍທາ ແລະຂົນສົ່ງ, ກົມເຄຫາ ແລະຜັງເມືອງ, ກະຊວງໂຍທາທິການ ແລະຂົນສົ່ງ.
ຈຸດປະສົງຫຼັກຂອງໂຄງການແມ່ນ ເພື່ອຈັດສັນ ແລະເພື່ອປັບປຸງເສັ້ນທາງດັ່ງກ່າວ ໃຫ້ມີຄວາມເປັນລະບຽບຮຽບຮ້ອຍ, ໃຫ້ສວຍງາມ, ສະດວກ ແລະປອດໄພ ເພື່ອແກ້ໄຂບັນຫາການຈອດລົດບໍ່ເປັນລະບຽບ ແລະຈອດບໍລິເວນທາງຍ່າງ ພ້ອມທັງອຳນວຍຄວາມສະດວກ ແລະຮັບຮອງການຈັດງານຖະໜົນຄົນຍ່າງໃນອະນາຄົດ ໃຫ້ປະຊາຊົນ, ແຂກພາຍໃນ ແລະຕ່າງປະເທດທີ່ສັນຈອນໄປມາ ມີຄວາມສະດວກສະບາຍ
ແຫຼ່ງຂ່າວ: ໜັງງສືພິມ ວຽງຈັນໃໝ່