ໃນວັນທີ 24 ກຸມພາ 2017 ຜ່ານມາ ທີ່ບ້ານໂພນງາມໃຕ້ ເມືອງແປກ ແຂວງຊຽງຂວາງ ໄດ້ຈັດພິທີມອບ-ຮັບໂຄງການກໍ່ສ້າງ ຕິດຕັ້ງຕົບແຕ່ງເດີ່ນອະນຸສາວະລີ ທ່ານ ຕູ້ຢ່າ ໄຊຈູ ຂຶ້ນ ເຊິ່ງມອບໂດຍທ່ານ ບຸນຂຽນ ສຸລິວົງ ຮອງຫົວໜ້າຮັບຜິດຊອບ ພິພິທະພັນໄກສອນພົມວິຫານ ແລະກ່າວຮັບໂດຍ ທ່ານ ຄຳແສນ ມະນີວົງ ຄະນະປະຈຳພັກແຂວງ ຮອງເຈົ້າແຂວງໆຊຽງຊຽງຂວາງ ມີການນຳຂອງສູນກາງ, ແຂວງ, ເມືອງ, ພະນັກງານ, ພໍ່ແ່ປະຊາຊົນ ແລະແຂກຖືກເຊີນ ທີ່ກ່ຽວຂ້ອງເຂົ້າຮ່ວມ
ໂຄງການດັ່ງກ່າວ ຮັບເໝົາກໍ່ສ້າງໂດຍ ບໍລິສັດ ສີວອນ ພັດທະນາກໍ່ສ້າງ ຈຳກັດຜູ້ດຽວ ເຊິ່ງເລີ່ມກໍ່ສ້າງແຕ່ທ້າຍປີ 2014 ເປັນຕົ້ນມາ ເຊິ່ງໄດ້ຕິດຕັັ້ງຮູບຫຼໍ່ໝົດຄີງ, ຕິດຕັ້ງໄຟຟ້າ, ນໍ້າປະປາ ຕົບແຕ່ງເດີ່ນສວນ ເນື້ອທີທັງໝົດ 8.568 ຕາແມັດ ການກໍ່ສ້າງແມ່ນສຳເລັດແລ້ວ 100% ລວມມູນຄ່າທັງໝົດ 14 ຕື້ກວ່າກີບ
ທ່ານ ຕູ້ຢ່າ ແມ່ນຜູ້ນຳຮຸ່ນທຳອິດ ຂອງການປະຕິວັດລາວ ທີ່ໄດ້ອຸທິດຊີວິດ ເພື່ອປະເທດຊາດ ແລະການປະຕິວັດ ແມ່ນທະຫານທີ່ມີຄວາມເກັ່ງກ້າສາມາດ ສະຫຼາດຫຼັກແຫຼມ ມີໄຫວພິກ ທີ່ຄ່ອງແຄ້ວຊຳນານທາງດ້ານພູມີປະເທດເຂດພາກເໜືອ ແລະເປັນນັກການທູດທາງທະຫານທີ່ດີເດັ່ນຮຸ່ນທຳອິດໃນການກໍ່ຕັ້ງສາຍພົວພັນມິດຕະພາບລາວ-ຫວຽດນາມ ເຊິ່ງກາຍເປັນສັນຍາລັກແຫ່ງມູນເຊື້ອຄວາມສາມັກຄີພິເສດຮ່ວມສຳພັນສູ້ຮົບ ແລະໂຄສະນາເຕົ້າໂຮມຄວາມສາມັກຄີກອງພັນທີ 2 ກອງທັບປະຊາຊົນລາວ
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ