ຕາມການລາຍງານຂອງ ທ່ານ ພວງປາຣິສັກ ປະວົງວຽງຄໍາ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ແຈ້ງໃຫ້ຮູ້ ເມື່ອບໍ່ດົນມານີ້ວ່າ: ເພື່ອສຸມໃສ່ວຽກງານພັດທະນາ ແລະແກ້ໄຂຄວາມທຸກຍາກ ພາຍໃນປີ 2017 ລັດໄດ້ສຸມທຶນຮອນ ຈຳນວນ 1.368,57 ຕື້ກີບ, ໃນນີ້ ມີທຶນຈາກງົບປະມານ ພາຍໃນ 164,16 ຕື້ກີບ, ກວມເອົາ 5,86% ຂອງການລົງທຶນລວມ ຂອງລັດ 2.800 ຕື້ກີບ, ໂດຍສຸມໃສ່ 20 ຈຸດສຸມຂອງລັດຖະ ບານ 28,8 ຕື້ກີບ, 71 ຈຸດສຸມ ຂອງທ້ອງຖິ່ນ 75 ຕື້ກີບ, 145 ຈຸດສຸມ ຈັດສັນພູມລໍາເນົາ ບ່ອນທໍາມາຫາກິນ ຂອງປະຊາຊົນ 49,36 ຕື້ກີບ ແລະ ທຶນສົມທົບກອງທຶນຫລຸດຜ່ອນ ຄວາມທຸກຍາກ 11 ຕື້ກີບ. ເພື່ອໃຫ້ມີປະສິດທິພາບ ແລະປະຊາຊົນໄດ້ຮັບຜົນ ລັດໄດ້ວາງມາດຕະການຈໍານວນໜຶ່ງ ເປັນຕົ້ນແມ່ນ ໃຫ້ເອົາໃຈໃສ່ເປັນເຈົ້າການ ປະສານງານ ແລະ ຄຸ້ມຄອງການສ້າງແຜນງານ, ແຜນການ ແລະ ໂຄງການລະອຽດ ທີ່ມີຕົວຊີ້ວັດຈະແຈ້ງ ຢູ່ບັນດາຈຸດສຸມບູລິມະສິດ ຮ່ວມກັບບັນດາພາກ ສ່ວນກ່ຽວຂ້ອງຂັ້ນສູນກາງ ແລະ ທ້ອງຖິ່ນ, ປັບປຸງກົງຈັກ ວຽກງານການຈັດຕັ້ງ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ໃຫ້ເຊື່ອມສານກັບວຽກງານ ກະສິກໍາ-ປ່າໄມ້ ທີ່ພວມກໍາລັງປັບປຸງພາລະບົດບາດ ໃນປັດຈຸບັນ ໃຫ້ມີຄວາມເຂັ້ມແຂງ, ເພີ່ມທະວີຄວາມເຂັ້ມງວດ ໃນການຈັດຕັ້ງປະຕິບັດ ແຜນການ ແລະ ການເງິນ, ຍົກເວັ້ນການປະຕິບັດ ໂຄງການນອກແຜນ, ຍົກສູງສະຕິເຄົາລົບ ແລະ ປະຕິບັດລະບຽບກົດໝາຍ ຢ່າງເຂັ້ມງວດ ເພື່ອຫລີກລ້ຽງໜີ້ສິນຄຸມເຄືອ ສໍາລັບປີຕໍ່ໄປ, ປະຕິບັດ ໂຄງການລົງທຶນຂອງລັດ ເຂົ້າໃນວຽກງານ ພັດທະນາຊົນນະບົດ ແລະ ລືບລ້າງຄວາມທຸກຍາກໄປຕາມຈຸດສຸມ, ເດັດຂາດບໍ່ປະຕິບັດ ໂຄງການນອກແຜນ ຫລື ໂຄງການລົງທຶນກ່ອນ ໂດຍປະຕິບັດຕາມຄໍາສັ່ງຂອງນາຍົກ ລັດຖະມົນຕີຢ່າງເຄັ່ງຄັດ, ຂະແໜງການ ທີ່ກ່ຽວຂ້ອງຂັ້ນແຂວງ, ຂັ້ນເມືອງ, ຕ້ອງກໍານົດຕາມຫົວໜ່ວຍລາຄາ ໃນການກໍ່ສ້າງພື້ນຖານໂຄງລ່າງ ຢູ່ຊົນນະບົດເປັນຕົ້ນ ໂຮງຮຽນ, ໂຮງໝໍ, ນ້ຳລີນ, ຕາຂ່າຍໄຟຟ້າ, ເສັ້ນທາງ ແລະ ອື່ນໆ ໂດຍໃຫ້ມີມາດຕະການຈັດຕັ້ງ ແລະ ຕິດຕາມກວດກາຢ່າງເຂັ້ມງວດ ເພື່ອຫລີກລ້ຽງໂຄງການທີ່ມີມູນຄ່າ ສູງເກີນຄວາມເປັນຈິງ
ແຫຼ່ງຂ່າວ: ສຳນັກຂ່າວສານປະເທດລາວ