ຕາມການໃຫ້ສຳພາດຂອງ ທ່ານ ບຸນ​ທຽນ ແກ້ວ​ສີ​ພາ ຫົວໜ້າ​ກົມ​ການ​ຄ້າ​ພາຍ​ໃນ ກະຊວງ​ອຸດສາຫະກຳ ແລະ ການ​ຄ້າ ກ່າວ​ວ່າ: ກະຊວງອຸດສາຫະກຳ ແລະການຄ້າ ໄດ້ເອົາໃຈໃສ່ຢ່າງແທ້ຈິງ ກ່ຽວກັບລາຄາສິນຄ້າ ບໍ່ໃຫ້ພໍ່ຄ້າແມ່ຄ້າໃນຕະຫຼາດ ສວຍໂອກາດຂຶ້ນລາຄາສິນຄ້າ ຕາມການປັບຂຶ້ນຂອງດັດຊະນີເງິນເດືອນ, ດັ່ງນັ້ນ ການຈັດຕັ້ງ​ຈຶ່ງປະຕິບັດວຽກ​ງານ​ຄຸ້ມ​ຄອງ​ລາຄາ ແລະ ຄ່າ​ບໍລິການ​ໃນ​ໄລຍະ​ຜ່ານ​ມາ​ຈົນເຖິງ​ປັດຈຸບັນ ເຊິ່ງທາງກະຊວງ​ອຸດ​ສາ​ຫະກຳ ແລະ ການ​ຄ້າ ໄດ້​ຄົ້ນຄວ້າ ແລະ ກຳນົດ​ເອົາ​ລາຍການ​ສິນຄ້າ​ຄວບ​ຄຸມ​ປະກອບ​ມີ 4 ປະເພດ ລວມ​ມີ 14 ລາຍການ​ຄື: ນ້ຳມັນເຊື້ອ​ໄຟ​ມີ 3 ລາຍການ (ນ້ຳມັນແອັດ​ຊັງ​ພິເສດ ແອັດ​ຊັງ​ທຳ​ມະດາ ແລະ ນ້ຳມັນ​ກາ​ຊວນ) ປະເພດ​ເຂົ້າ 6 ລາຍການ ປະເພດຊີ້ນ 4 ລາຍການ ແລະ ປະເພດປາ 1 ລາຍການ​ຄື: ປາ​ນິນ​ກະຊັງ.

ສ່ວນ​ລາຄາ​ສິນຄ້າ​ໃນ​ຕະຫຼາດ​ຂອງ​ປີ 2017 ແມ່ນ​ມີຄວາມ​ສະຫງົບ ໂດຍ​ສະເພາະ ໃນ​ໄລຍະ​ເທ​ສະການ ແລະ ງານບຸນ​ປະເພນີ​ສຳຄັນ​ຕ່າງໆ ລາຄາມີ​ການ​ເໜັງ​ຕີງ​ຕາມ​ກົນ​ໄກ​ຕະຫຼາດ ແລະ ຕາມ​ລະດູ​ການທີ່​ສາມາດ​ຄວບ​ຄຸມ​ໄດ້ ໃນ​ນັ້ນ ລາຄາຂາຍຍົກ-ຂາຍຍ່ອຍ ຊີ້ນ​ໝູ ສູງສຸດ​ບໍ່​ໃຫ້​ເກີນ 38 ພັນ​ກີບ​ຕໍ່​ກິ​ໂລ ເຂົ້າສານ​ໜຽວ 7.500-8.000 ກີບ​ຕໍ່​ກິ​ໂລ ເຂົ້າຈ້າວ 8.000-9.000 ກີບ​ຕໍ່​ກິ​ໂລ ຊີ້ນ​ງົວ-ຄວາຍ 70.000-80.000 ກີບ​ຕໍ່ກິ​ໂລ ສ່ວນ​ປາ​ນິນ​ກະຊັງ 18.000-22.000 ກີບ​ຕໍ່​ກິ​ໂລ ສ່ວນ​ລາຄາ​ພືດ​ຜັກ ໝາກເຜັດ ໝາກ​ນາວ ແລະ ຜັກຫອມ​ປະເພດ​ຕ່າງໆ ກໍ່​ຖື​ວ່າ​ຍັງ​ຢູ່​ໃນ​ເກນ​ປົກກະຕິ.

ແຫຼ່ງຂ່າວ: ຫນັງສືພິມ ວຽງຈັນໃໝ່