ໃນວັນທີ 20 ກຸມພາ 2017 ຜ່ານມາ ທີ່ສູນກາງແນວລາວສ້າງຊາດ ທ່ານ ໄຊສົມພອນ ພົມວິຫານ ປະທານສູນກາງ ແນວລາວສ້າງຊາດ (ສນຊ) ໄດ້ ຕ້ອນຮັບການເຂົ້າຢ້ຽມຂ່ຳນັບ ຂອງທ່ານນາງ ເຣນາ ບິດເຕີ (Ms Renna Bitter) ເອກອັກ ຄະລັດຖະທູດອາເມຣິກາຄົນໃໝ່ປະຈຳລາວ
ທ່ານ ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ທ່ານ ນາງ ເຣນາ ບິດເຕີ ທີ່ໄດ້ຖືກແຕ່ງຕັ້ງ ມາດຳລົງຕຳແໜ່ງເປັນເອກອັກຄະລັດຖະທູດອາເມຣິກາຄົນໃໝ່ ປະຈຳ ສປປ ລາວ ແລະ ສະແດງຄວາມເຊື່ອໝັ້ນ ວ່າທ່ານເອກອັກຄະລັດຖະທູດຄົນໃໝ່ ຈະສືບຕໍ່ໃຫ້ການຮ່ວມມື ແລະ ປະສານສົມທົບກັບພາກສ່ວນທີ່ກ່ຽວຂ້ອງຂອງລາວ ເພື່ອເປັນຂົວຕໍ່ມິດຕະພາບ ລະຫວ່າງ ອາເມຣິກາ ແລະ ສປປ ລາວ ປະກອບສ່ວນ ອັນສຳຄັນເຂົ້າໃນການເພີ່ມທະວີສາຍພົວພັນ ແລະການຮ່ວມມື ລະຫວ່າງສອງປະເທດໃຫ້ມີບາດກ້າວຂະຫຍາຍຕົວຍິ່ງໆຂຶ້ນ.
ໃນໂອກາດດຽວກັນນັ້ນ, ທ່ານ ນາງ ເຣນາ ບິດເຕີ ໄດ້ສະແດງຄວາມຂອບໃຈຕໍ່ ທ່ານ ໄຊສົມພອນ ພົມວິຫານທີ່ໄດ້ເສຍສະຫຼະເວລາ ໃນການຕ້ອນຮັບຄັ້ງນີ້ ແລະ ໄດ້ແຈ້ງຄວາມພ້ອມຂອງຕົນໃນໄລຍະການປະຕິບັດໜ້າທີ່ ການທູດຢູ່ ສປປ ລາວ ແລະ ຢືນຢັນຈະຕັ້ງໜ້າປະຕິບັດໜ້າທີ່, ສືບຕໍ່ການຊ່ວຍເຫຼືອຕ່າງໆ ທີ່ເຄີຍມີຮ່ວມກັນ ໃຫ້ເກີດດອກອອກຜົນປະກອບ ສ່ວນເຂົ້າໃນການເພີ່ມທະວີ ສາຍພົວພັນ ແລະ ການຮ່ວມມື ລະຫວ່າງສອງປະເທດໃຫ້ມີປະສິດທິຜົນ, ນຳເອົາຜົນປະໂຫຍດ ໃຫ້ແກ່ປະຊາຊົນທັງສອງປະເທດ
ແຫຼ່ງຂ່າວ: ໜັງສືພິມ ປະຊາຊົນ