ໃນວັນທີ 22 ກຸມພາ 2017 ຜ່ານມານີ້ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປລາວ ໄດ້ເຂົ້າພົບປະກັບ ສົມເດັດ ອັກຄະມະຫາເສນາບໍດີ ເຕໂຈຮຸນແຊນ, ນາຍົກລັດຖະມົນຕີກຳປະເຈຍ ທີ່ວັງສັນິພາບ, ລາຊະອານາຈັກກຳປູເຈຍ ໃນໂອກາດເດີນທາງຢ້ຽມຢາມລັດຖະກິດ ທີ່ລາຊະອານາຈັກກຳປູເຈຍ ລະຫວ່າງວັນທີ 22-23
ໃນໂອກາດພົບປະຄັ້ງນີ້, ທ່ານ ບຸນຍັງ ວໍລະຈິດ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ມີນ້ຳໃຈໄມຕີຈິດມິດຕະພາບຂອງຝ່າຍກຳປູເຈຍ ແລະສະແດງຄວາມຊົມເຊີຍ ຕໍ່ໝາກຜົນຂອງການປະຕິບັດນະໂຍບາຍ ປອງດອງຊາດຂອງ ຣາຊະອານາຈັກ ກຳປູເຈຍ. ພ້ອມນັ້ນ, ສອງຝ່າຍໄດ້ຕີລາຄາສູງ ຕໍ່ສາຍພົວພັນທີ່ມີມູນເຊື້ອອັນຍາວນານ ນັບແຕ່ສ້າງຕັ້ງສາຍພົວພັນການ ທູດ ໃນປີ 1956 ມາເຖິງປັດຈຸບັນ ເປັນເວລາ 61 ປີ, ເຊິ່ງສາຍພົວພັນລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ ແມ່ນສາຍພົວພັນແບບບ້ານໃກ້ເຮືອນຄຽງ ບ້ານພີ່ເມືອງນ້ອງ ທີ່ມີຄວາມໄວ້ເນື້ອເຊື່ອໃຈກັນ ແລະ ເຂົ້າອົກເຂົ້າໃຈກັນສູງ ບໍ່ວ່າໃນໄລຍະຕໍ່ສູ້ກູ້ຊາດ ກໍຄືໄລຍະປົກປັກຮັກສາ ແລະ ສ້າງສາປະເທດຊາດ; ສອງຝ່າຍ ໄດ້ເຫັນດີສືບຕໍ່ເສີມຂະຫຍາຍສາຍພົວພັນ ແລະການຮ່ວມມືທີ່ແໜ້ນແຟ້ນ ແລະສືບຕໍ່ຮັກສາມູນເຊື້ອ ສາຍສຳພັນລະດັບສູງສຸດ ແລະສ້າງສັນ ລະຫວ່າງສອງປະເທດ ແລະການພົບປະຄັ້ງນີ້ ຈະເປັນພື້ນຖານອັນໜັກແໜ້ນ ຕໍ່ການເພີ່ມທະວີສາຍພົວພັນ ລະຫວ່າງສອງປະເທດ ກໍຄືປະ ຊາຊົນສອງຊາດ.
ໃນຕອນທ້າຍ, ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ເຊື້ອເຊີນ ພະບາດສົມເດັດ ພະບໍຣົມມະນຽດ ໂນໂຣດົມ ສີຫາໂມນີ ສະເດັດໄປຢ້ຽມຢາມ ສປປ ລາວ ໃນເວລາທີ່ເໝາະສົມ ເພື່ອສືບຕໍ່ປະກອບສ່ວນເຂົ້າ ໃນການເສີມສ້າງສາຍພົວພັນ ລະຫວ່າງສອງປະເທດໃນໄລຍະໃໝ່ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.
ແຫຼ່ງຂ່າວ: ສຳນັກຂ່າວສານປະເທດລາວ