ຕາມການໃຫ້ສຳພາດຂອງທ່ານ ທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໃນນາມຜູ້ຮັບຜິດຊອບການພັດທະນາພື້ນຖານໂຄງລ່າງ ກ່າວວ່າ: ກ່ອນໜ້ານີ້ໄດ້ມີການຂຶ້ນແຜນ ຄິດໄລ່ອອກແບບທາງດ້ານມາດຕະຖານເຕັກນິກຕ່າງໆ ເພື່ອນຳສະເໜີການນຳນະຄອນຫຼວງວຽງຈັນ ເພື່ອໃຫ້ການນຳນະຄອນຫຼວງ ນຳສະເໜີຕໍ່ລັດຖະບານຂໍການອະນຸມັດ.
ເສັ້ນທາງສີ່ແຍກໄຟແດງດົງໂດກຫາຕານມີໄຊ ຕໍ່ໃສ່ສາມແຍກສີເກີດ ຖືເປັນເສັ້ນທາງທີ່ມີຄວາມໝາຍສຳຄັນ ເປັນເສັ້ນທາງເວັ້ນຕົວເມືອງເສັ້ນດຽວ ທີ່ເຊື່ອມຕໍ່ທາງພາກເໜືອ ແລະ ພາກໃຕ້ ທີ່ມີລົດບັນທຸກໜັກ ຂົນສົ່ງໂດຍສານ ປະມານພັນກວ່າຄັນ ໃນແຕ່ລະວັນ ເຊິ່ງເສັ້ນທາງດັ່ງກ່າວມີຄວາມຍາວປະມານ 9 ກິໂລແມັດ, ຄວາມກວ້າງ 28 ແມັດ ມີຊ່ອງຈະລາຈອນທັງໝົດ 6 ເສັ້ນ ກ້ຳລະສາມເສັ້ນ ໂດຍມີຄັນຄູຂັ້ນກາງ ທາງກວ້າງ 2,7 ແມັດ ມີທາງຄົນຍ່າງທັງສອງຟາກທາງ 1,50 ແມັດ ມີລະບົບລະບາຍນ້ຳສອງຟາກ ຄວາມໜາຂອງໜ້າທາງ 20 ຊັງຕີແມັດ ມີອາຍຸໃຊ້ງານປະມານ 20 ປີ, ປະກອບດ້ວຍໄຟເຍືອງທາງຄົບຊຸດ ເປັນເສັ້ນທາງເບຕົງທັງໝົດ ໃຊ້ໄລຍະເວລາໃນການກໍ່ສ້າງ 2 ປີ ເຊິ່ງແມ່ນບໍລິສັດ ຕັ້ງຈະເລີນ ເປັນຜູ້ຮັບເໝົາກໍ່ສ້າງ ໂດຍການເຫັນດີຈາກລັດຖະບານ ດ້ວຍງົບປະມານຂອງລັດ 100% ມູນຄ່າທັງໝົດ 368 ຕື້ກວ່າກີບ ແລະ ຊຳລະຄືນໄລຍະເວລາ 7 ປີ ປັດຈຸບັນ ດຳເນີນການໄປໄດ້ 10% ພວມຢູ່ໃນໄລຍະກະກຽມດິນ ຈັດສັນເຄື່ອນຍ້າຍສິ່ງກີດຂວາງ ເຊິ່ງຄາດວ່າຈະສຳເລັດໃນທ້າຍປີ 2018 ທີ່ຈະມາເຖິງ.
ແຫຼ່ງຂ່າວ: ໜັງສືພິມ ວຽງຈັນໃໝ່